Lefelau dŵr yn dal yn uchel wedi oriau o law trwm yn y de

Daeth y rhybudd melyn am law trwm i ben am 19:00 nos Sul

Mae yna rhybudd bod lefelau dŵr yn rhan o Sir Benfro yn dal yn uchel a llifogydd o hyd ar rai ffyrdd yn dilyn oriau o law trwm.

Roedd rhybudd melyn y Swyddfa Dywydd am law trwm mewn grym ar hyd de Cymru am y rhan fwyaf o'r dydd, ddydd Sul.

Wrth i'r rhybudd ddod i ben am 19:00 nos Sul, roedd rhybudd llifogydd Cyfoeth Naturiol Cymru yn dal mewn grym yn ardal Afon Rhydeg yn Ninbych-y-pysgod.

Roedd rhybudd 'Byddwch yn Barod' hefyd mewn grym yn ne Sir Benfro.

Daeth y rhybuddion ddyddiau'n unig ar ôl i law trwm arwain at lifogydd difrifol yn y de orllewin.

Roedd y rhybudd yn berthnasol i 16 o siroedd ar hyd y de - Abertawe, Blaenau Gwent, Bro Morgannwg, Caerffili, Caerdydd, Casnewydd, Castell-nedd Port Talbot, Ceredigion, Merthyr Tudful, Sir Benfro, Sir Fynwy, Sir Gaerfyrddin, Powys, Pen-y-bont ar Ogwr, Rhondda Cynon Taf, Torfaen.

Roedd yr arbenigwyr wedi darogan llifogydd posib a thrafferthion ar y ffyrdd, gan gynghori pobl i chwilio am y wybodaeth ddiweddaraf cyn defnyddio gwasanaethau trafnidiaeth gyhoeddus.

Roedd disgwyl 10-20mm o law yn ardal y y rhybudd, a hyd at 35-45mm ar dir uchel.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.