Gwrthdrawiad fan: Dynes wedi marw a dyn yn yr ysbyty
- Cyhoeddwyd
Digwyddodd y gwrthdrawiad ar Ffordd Nantgarw, Caerffili
Mae dynes wedi marw a dyn yn ddifrifol wael yn ysbyty wedi gwrthdrawiad gyda fan yng Nghaerffili.
Cafodd un dyn 48 oed ei arestio yn dilyn y digwyddiad, ar amheuaeth o achosi marwolaeth ac o achosi anaf difrifol drwy yrru'n beryglus.
Mae hefyd ar amheuaeth o yrru dan ddylanwad alcohol a chyffuriau, ac yn parhau i gael ei holi yn y ddalfa.
Dywedodd Heddlu Gwent fod y gwrthdrawiad wedi digwydd ar Ffordd Nantgarw am tua 19:50 nos Wener, rhwng fan a dau gerddwr.
Cafodd dynes 67 oed o ardal Caerffili ei lladd, ac mae swyddogion bellach yn cynorthwyo ei theulu.
Mae dyn 58 oed o ardal Caerffili yn parhau i fod mewn cyflwr difrifol yn yr ysbyty.
Dywedodd yr heddlu eu bod yn apelio ar unrhyw un gyda gwybodaeth neu luniau dashcam o'r digwyddiad i gysylltu â nhw.