Caerffili: Arestio dwy fenyw a bachgen, 13, yn yr ysbyty

Fe ddigwyddodd y gwrthdrawiad ar Ffordd St Martins yng Nghaerffili

Mae dwy fenyw wedi'u harestio ac mae bachgen 13 oed yn yr ysbyty yn dilyn gwrthdrawiad yng Nghaerffili.

Fe gafodd yr heddlu a'r gwasanaeth ambiwlans eu galw i Ffordd St Martins tua 14:40 ddydd Gwener i'r gwrthdrawiad rhwng car, fan a cherddwr.

Cafodd bachgen - a oedd yn cerdded ar y pryd - ei gludo i'r ysbyty i gael triniaeth wedi'r digwyddiad.

Dywed yr heddlu fod dwy fenyw o Gaerdydd, a oedd yn teithio yn y fan, wedi'u harestio ar amheuaeth o achosi anaf drwy yrru'n ddiofal a gyrru cerbyd modur gyda chyfran o gyffur rheoledig penodedig sy'n uwch na'r terfyn penodedig.

Mae'r ddwy, sy'n 51 a 42 oed, yn parhau yn y ddalfa ac mae ymchwiliad yr heddlu'n parhau.

Mae'r ffordd yn parhau ar gau ac mae'r heddlu yn gofyn i bobl osgoi'r ardal.