Cwpan Her Ewrop: Scarlets 32-30 Clermont Auvergne

Johnny Williams a Ryan Conbeer yn dathlu cais

Mae'r Scarlets wedi sicrhau eu lle yn rownd gynderfynol Cwpan Her Ewrop yn dilyn noson ddramatig yn Llanelli.

Aeth tîm Dwayne Peel ar y blaen yn yr hanner cyntaf diolch i geisiau gan Halfpenny, Costelow a Johnny Williams

Ond roedd Clermont, er colli'r canolwr Irae Simone wedi iddo dderbyn cerdyn coch wedi 24 munud, yn edrych yn barod i hawlio lle yn rownd gynderfynol wrth iddynt ddod yn ôl o 15-3 i lawr i arwain 30-22.

Gwrthododd y Scarlets ag ildio, serch hynny, a chipiwyd y fuddugoliaeth pan groesodd Ryan Conbeer gyda phum munud yn weddill cyn cic lwyddiannus Sam Costelow o'r llinell ystlys.

Hon oedd 11eg buddugoliaeth y Scarlets mewn 13 gêm wrth iddynt guro Clermont am y tro cyntaf mewn wyth ymgais.

Bydd y Scarlets nawr yn croesawu naill ai Glasgow neu'r Lions yn y rownd gynderfynol.