Apêl am dystion wedi i ddyn farw mewn gwrthdrawiad
- Cyhoeddwyd
Digwyddodd y gwrthdrawiad ar Heol Fochriw ger Pontlotyn
Mae dyn 43 oed wedi marw mewn gwrthdrawiad ffordd yn gynnar fore Iau.
Digwyddodd y gwrthdrawiad rhwng Renault Clio a Ford Ka yn Fochriw, ger Pontlotyn, Sir Caerffili.
Bu farw gyrrwr y Clio, Gareth Davies, 43, o ardal Rassau, Glyn Ebwy, yn y fan a'r lle.
Mae ei deulu'n cael cymorth swyddogion heddlu arbenigol.
Cafodd gyrrwr y Ka - dyn 27 oed o Ferthyr Tudful - ei gludo i'r ysbyty gyda mân anafiadau.
Cafodd ei arestio ar amheuaeth o yrru'n beryglus.
Mae Heddlu Gwent yn awyddus i siarad ag unrhyw un oedd yng nghyffiniau Heol Fochriw, Pontlotyn, rhwng 05:00 a 05:30 ddydd Iau.