Lansio ymgyrch ar gyfer Wyddfa di-blastig

Mae dros 600,000 o bobl yn ymweld â'r Wyddfa yn flynyddol

Sicrhau fod yr Wyddfa yn ddi-blastig yw nod Awdurdod Parc Cenedlaethol Eryri wrth lansio ymgyrch ymwybyddiaeth ymysg cerddwyr a busnesau.

Mae 'na dros hanner miliwn o bobl yn ymweld â'r Wyddfa bob blwyddyn ac mae sbwriel yn broblem.

Y gobaith ydy sicrhau statws i'r Wyddfa fel mynydd di-blastig cyntaf y byd drwy gael gwared ar ddefnyddio plastig untro fel poteli a chwpanau.

Mae sbwriel, ac yn arbennig plastig, yn broblem ymhobman a dros y blynyddoedd diwethaf mae gwirfoddolwyr wedi bod yn ceisio clirio sbwriel o lethrau'r Wyddfa.

Gyda miloedd yn heidio am y copa bob blwyddyn mae 'na bryder am effaith tymor hir y plastig ar y mynydd ac ar fyd natur yn gyffredinol.

• Ai'r Wyddfa fydd y mynydd di-blastig cyntaf yn y byd?

• Gwirfoddolwyr Eryri sy'n tacluso llanast y 'lleiafrif'

• Ymwelwyr yn dangos 'diffyg parch' tuag at Eryri

Dywed Emyr Williams bod angen newid sut mae pobl yn prynu nwyddau

Dywedodd Emyr Williams, Prif Weithredwr Parc Cenedlaethol Eryri: "Prosiect ydy hwn i godi ymwybyddiaeth a thrio newid ymarferiad pobl ar sut i reoli papur.

"Mae pobl yn dod i mewn i'r ardal gyda gorchuddion ar fwyd, cario eu dŵr ac yn y blaen, felly mae hwnnw'n broblem weledol iawn a rhywbeth mae'n gwirfoddolwyr ni yn hel yn ddyddiol neu yn wythnosol."

Ychwanegodd fod angen annog pobl i newid sut maen nhw'n prynu nwyddau ac i "ystyried mwy am blastig a'r amgylchedd".

Yn ôl Craig Edwards does na fawr ddim gwahaniaeth pris

Yn Llanberis ddydd Llun cafodd y cyhoedd a busnesau gyfle i weld beth sy'n bosib defnyddio yn lle cwpanau plastig ac ati.

Yn ôl Craig Edwards o Gwmni Gwynedd Disposables: "Mae gynnon ni gwpanau coffi, tê neu soup… potiau bach i ddal pethau fel salad neu hyd yn oed petha' i ddal byrgyrs a chips.

"Newid o'r hen polystyrine i beth compostable sy'n pydru ymhen 24 wythnos… amrywiaeth o lot o bethau gwahanol."

Ychwanegodd fod y gost o newid i ddefnyddio cynnyrch fwy cynaliadwy yn fater o "geiniogau".

Mae Angela Jones yn annog busnesau lleol i helpu ymwelwyr i ail lenwi poteli dŵr

Mae 'na obaith hefyd i gynnig llefydd i ail lenwi poteli yn hytrach na'u bod yn cael eu taflu i ffwrdd.

Dywedodd Angela Jones, Rheolwr Partneriaethau Parc Cenedlaethol Eryri, y bydd lle i ail lenwi poteli dŵr ar waelod "pob un llwybr i'r Wyddfa yn ein meysydd parcio".

"Dyna un o'r pethau 'da ni'n ofyn i'r busnesau yma heddiw i wneud ydy cynnig ail lenwi poteli dŵr i bobl," meddai.

Mae Dylan Jones yn gefnogol i'r cynlluniau diweddaraf

Ym mhentref bach Llanberis, roedd 'na gefnogaeth i'r syniad.

Dywedodd Dylan Jones, sy'n rhedeg Siop Crib Goch yn y pentref: "Mae'n syniad da yn dydi, mae'n mynd i fod yn dipyn o job 'swn i'n feddwl.

"Mae pob dim yn dod i mewn [i'r siop] mewn plastig ond 'da ni wedi bod yn gwneud pethau gwahanol i drio cael gwared o be 'da ni'n gynhyrchu fel siop… newid bagiau plastig i fagiau papur a ballu.

"Jyst rhyw betha' bach fel'na i drio helpu."