Carcharu dyn am ymosodiad rhyw 'arswydus' ym Mharc Biwt

Yn ôl yr heddlu roedd ymosodiad Edey yn un "arswydus ar ddynes ar ei phen ei hun yng ngolau dydd"

Mae dyn 38 oed o Gaerdydd wedi cael ei garcharu am ymosodiad rhyw ar ddynes ym Mharc Biwt yn y brifddinas ym mis Awst 2022.

Roedd dynes 32 oed yn cerdded drwy'r parc tua 06:40 ar ddydd Sul, 31 Awst 2022 pan wnaeth Dale Edey afael ynddi ac ymosod yn rhywiol arni ger Pont y Gored Ddu ar Lwybr Taf.

Fe blediodd Edey o Bentwyn yn euog i ymosod yn rhywiol ac ymosod gan achosi niwed corfforol.

Yn Llys y Goron Casnewydd, cafodd ddedfryd o bedair blynedd ac 11 mis o garchar, gyda thair blynedd estynedig ar drwydded.

Roedd y ddynes yn cerdded ger Pont y Gored Ddu pan ymosododd Dale Edey arni

Cafodd Edey ei arestio dair wythnos wedi'r ymosodiad ar ôl cael ei adnabod drwy dystiolaeth DNA ar ddillad y ddynes.

Yn wreiddiol fe wnaeth o wadu'r troseddau, ond fe bleidiodd yn euog ar ddiwrnod cynta'r achos yn ei erbyn ym mis Mehefin.

Dywedodd y Ditectif Gwnstabl Simon Hicks o Heddlu De Cymru: "Roedd hwn yn ymosodiad arswydus ar ddynes ar ei phen ei hun yng ngolau dydd.

"Hoffwn gydnabod dewder a chryfder y dioddefwr yn adrodd ar yr hyn ddigwyddodd, ac yn siarad mor ddewr am yr effaith ddifrifol y mae gweithredoedd Edey wedi eu cael arni.

"Rydym yn gobeithio y bydd y dedfrydu yn rhoi rhywfaint o deimlad o ddiweddglo iddi, ac y bydd yn ei galluogi i adfer ei hyder a symud ymlaen gyda'i bywyd."