Sioe Frenhinol 2024 i gael Pentref Garddwriaethol

Roedd yr Adran Arddwriaeth yn un oedd yn absennol eleni

Mewn cyfarfod ar faes y Sioe Frenhinol yn Llanelwedd ddydd Mawrth fe gafodd cynlluniau eu datgelu ar gyfer adran arddwriaeth yn y sioe y flwyddyn nesaf.

Yn ystod y lansiad amlinellodd Aled Rhys Jones, Prif Weithredwr Cymdeithas Amaethyddol Frenhinol Cymru (CAFC), y weledigaeth newydd ar gyfer y Pentref Garddwriaethol a rhannodd syniadau dylunio posibl o sut y gall y pentref edrych.

Er bod yr adran wedi bod yn colli tua £40,000 bob blwyddyn, yn ôl y gymdeithas, roedd hi'n siom i rai yn y maes nad oedd adran o'r fath eleni.

Dywedodd Donald Morgan o siop Blodau'r Bedol yn Llanrhystud: "Roedd gyda ni feirniaid yn dod o dros Gymru a Lloegr aton ni. O ran yr adran gosod blodau, lle ro'n i'n gweithio, roedden nhw'n dweud wrtha' i bod y safon yn well na'r safon yn Chelsea."

Bydd Aled Rhys Jones yn croesawu barn cyfrannwyr i'r adran

Ond wrth amlinellu syniadau ar gyfer 2024, dywedodd Aled Rhys Jones: "Mae'r dyluniad wedi'i seilio ar syniadau allweddol ynglŷn â chynhwysedd a bioamrywiaeth, gyda llwyfan ar gyfer sgyrsiau, seminarau ac arddangosfeydd rhyngweithiol a lleoedd stondinau ar gyfer arddangoswyr.

"Yn ganolog i'r pentref fydd mannau ar gyfer dangos cystadleuol, yn arbennig y gosod blodau a'r cynnyrch llysiau y mae Sioe Frenhinol Cymru yn enwog amdanynt.

"Rydym yn dal yng nghyfnodau cynnar datblygu'r cysyniad hwn ac rydym yn gweld hyn fel prosiect cydweithredol ble gall gwahanol bartneriaid cyflenwi, noddwyr a rhanddeiliaid ein helpu i gyflawni'r weledigaeth uchelgeisiol hon."

Roedd y Gweinidog Materion Gwledig, Lesley Griffiths AS hefyd yn bresennol a dywedodd: "Mae sector garddwriaeth bywiog yn uchel ar agenda Llywodraeth Cymru ar gyfer datblygu diwydiant amaethyddol cynaliadwy wrth iddo ddarparu amryw o fuddion amgylcheddol, cymdeithasol ac economaidd.

"Mae'n bwysig fod ein garddwriaethwyr yn rhan annatod o hyn, a dyna pam fy mod yn falch iawn o glywed y cynlluniau amlinellol ar gyfer y Pentref Garddwriaethol newydd yn Sioe'r flwyddyn nesaf."

Mae CAFC yn bwriadu agor y Pentref Garddwriaethol newydd yn Sioe Frenhinol Cymru 2024 ac mae'n gwahodd rhanddeiliaid, partneriaid a chefnogwyr i gymryd rhan a rhannu syniadau ac adborth yn y misoedd i ddod.