Adran Dau: Barrow 1-1 Wrecsam

Elliot Lee yn sgorio ei bumed gôl i Wrecsam y tymor hwn

Roedd yna gôl gynnar i Wrecsam brynhawn Sadwrn wrth iddyn nhw chwarae eu pumed gêm yn Adran Dau.

Elliot Lee a blannodd y bêl yng nghornel y rhwyd wedi trosedd yn erbyn Ollie Palmer.

Y Dreigiau oedd yn chwarae orau yn yr hanner cyntaf ac roedd yna gyfleoedd da i flaenwyr Wrecsam ond doedd dim sgôr pellach yn yr hanner cyntaf.

Daeth Barrow yn ôl i'r gêm yn yr ail hanner gyda gôl grefftus gan Emile Acquah - saith munud wedi'r ailddechrau.

Wedi'r gôl roedd Barrow yn llawer iawn mwy hyderus ac yn bygwth y gôl yn gyson.

Cyfartal oedd hi ar y chwiban olaf a Wrecsam yn siomedig na sicrhawyd y tri phwynt.