20mya: Aelodau o'r Senedd wedi derbyn negeseuon bygythiol

Dywedodd Elin Jones bod staff wedi bod yn delio â negeseuon sarhaus sydd wedi eu hanelu at Aelodau o'r Senedd

Mae gwleidyddion yn y Senedd wedi derbyn negeseuon bygythiol oherwydd eu safiad ar y newid i derfyn cyflymder 20mya, meddai'r Llywydd Elin Jones.

Dywedodd bod staff wedi bod yn delio â negeseuon ar gyfryngau cymdeithasol, e-bost a hyd yn oed negeseuon ffôn sarhaus.

Anogodd aelodau o'r Senedd i sicrhau bod "trafodaeth gyhoeddus yng Nghymru yn bwyllog, yn urddasol ac yn barchus".

Daeth y terfyn cyflymder newydd mewn ardaloedd adeiledig i rym ddydd Llun diwethaf.

Cafodd y newid i derfynau cyflymder ar ffyrdd cyfyngedig ei gyflwyno ar 17 Medi

"Dros nos rydw i wedi dod yn ymwybodol o sawl aelod, gan gynnwys fy hun, yn derbyn negeseuon sarhaus a bygythiol ar gyfryngau cymdeithasol, e-bost a ffôn oherwydd eu safiad ar y pwnc hwn," meddai wrth gyfarfod o Senedd Cymru.

"Er ei bod yn galonogol gweld diddordeb digynsail yn ein pwyllgor deisebau a'i waith, mae gennym ni oll ddyletswydd i sicrhau bod trafodaeth gyhoeddus yng Nghymru yn bwyllog, yn urddasol ac yn barchus.

"Mae hynny'n golygu gosod y naws ar gyfer sut rydym yn disgwyl i eraill fynegi eu barn, beth bynnag yw eu safiad ar y mater hwn neu unrhyw fater arall, a'n bod yn gwneud hynny mewn ffordd nad yw'n diraddio nac yn tanseilio unrhyw unigolyn."

• Nifer uchaf erioed yn arwyddo deiseb 20mya

• Terfyn cyflymder newydd 20mya yn dod i rym

Cyfeiriodd Elin Jones at ffrae ddydd Mawrth lle cyhuddwyd Andrew RT Davies gan Mark Drakeford o beidio â dweud y gwir dros y terfyn cyflymder.

Gwrthododd Mark Drakeford ildio i alwadau gan y Ceidwadwyr Cymreig i ailystyried y terfyn cyflymder newydd o 20mya

Mae'r Ceidwadwyr Cymreig wedi honni'n gyson ei fod yn derfyn cyffredinol, i gyhuddiadau gan Lafur Cymru mai gwybodaeth anghywir yw hynny gan fod cynghorau wedi gosod eithriadau i'r terfyn newydd.

Ysgrifennodd Mr Davies at y Llywydd Elin Jones yn mynnu ymddiheuriad gan Mr Drakeford.

"Mae'n gywir i ddweud bod y cyfyngiad cyffredinol blaenorol o 30mya wedi ei ddisodli gan gyfyngiad cyffredinol o 20mya ac mae'n gamarweiniol i'r prif weinidog honni fel arall," meddai Mr Davies.

Dywedodd Ms Jones wrth y Senedd ei bod wedi ysgrifennu at y ddau ohonynt: "Rwyf wedi derbyn sylwadau gan un aelod am ymddygiad aelod arall yn ystod trafodion ddoe ac wedi gohebu â'r ddau unigolyn yn unol â hynny.

"Fe wnaf gloi drwy annog aelodau i gadw hyn oll mewn cof wrth fynegi eu barn yn y siambr ac yn ei dro ddylanwadu ar sut mae eraill yn ymddwyn y tu allan i'r siambr hon."

Ceryddodd Elin Jones y prif weinidog yn ei llythyr ato gan ddweud ei fod wedi mynd y tu hwnt i "gyfnewid barn arferol".

Gwrthododd Llywodraeth Cymru wneud sylw.