Agor cwest Kian Daniel Collier fu farw ar yr A55

Arweiniodd cau ffordd yr A55 tua'r dwyrain at dagfeydd yn yr ardal

Mae cwest wedi agor i farwolaeth dyn a gafodd ei ladd mewn gwrthdrawiad - a oedd, mae'n cael ei honni, yn ymwneud â thacsi oedd wedi ei ddwyn - yn Sir Conwy.

Roedd Kian Daniel Collier, 22, yn teithio ar ei ben ei hun mewn Hyundai gwyn pan darodd y car yn erbyn wal ar yr A55 ger Penmaenmawr tua 06:00 ar 28 Hydref.

Bu farw Mr Collier, o Ffordd Tan y Lan, Hen Golwyn, yn y fan a'r lle.

Roedd cwmni tacsi Premier Group o Fangor, sy'n berchen ar y car, wedi datgan yr wythnos diwethaf bod y cerbyd wedi'i ddwyn oddi wrthyn nhw ac nad oedd un o'u gyrwyr yn gysylltiedig â'r digwyddiad.

Mewn gwrandawiad byr yn Rhuthun ddydd Llun, dywedodd Crwner Cynorthwyol Dwyrain a Chanol Gogledd Cymru, Kate Robertson, mai cyfres o anafiadau oedd achos marwolaeth Mr Collier.

"Mae ein hymchwiliadau i'r digwyddiad hwn yn parhau, gan gynnwys ymholiadau ynghylch amheuaeth o gymryd cerbyd modur heb ganiatâd," meddai Heddlu Gogledd Cymru.