Pencampwriaeth Rygbi Unedig: Caerdydd 12-18 Bulls

Rey Lee-Lo ar ei ffordd i groesi am ail gais i Gaerdydd

Cafodd Caerdydd eu trechu gan y Bulls mewn gêm agos ym Mharc yr Arfau nos Wener.

Fe ddechreuodd y tîm o Dde Affrica yn dda, gan sgorio dau gais sydyn trwy Embrose Papier a Sebastian De Klerk.

Ond llwyddodd Caerdydd i daro 'nol gyda chais gan Mason Grady i'w gwneud hi'n 5-12 i'r ymwelwyr ar yr egwyl.

Wedi i'r canolwr David Kriel weld cerdyn melyn i'r Bulls fe wnaeth Caerdydd gymryd mantais yn syth wrth i Rey Lee-Lo groesi am gais.

Diolch i ddwy gôl gosb gan Chris Smith yn yr ail hanner roedd hi'n 12-18 i'r ymwelwyr yn mynd i'r munudau olaf.

Er i Gaerdydd bwyso, roedd y Bulls wedi gwneud digon, o drwch blewyn, i sicrhau'r fuddugoliaeth.