Heddlu'n apelio am luniau dashcam wedi gwrthdrawiad Garreg

Mae'r heddlu sy'n ymchwilio i farwolaethau pedwar dyn ifanc mewn gwrthdrawiad yng Ngwynedd yn apelio ar unrhyw un sydd â lluniau dashcam allai fod o ddefnydd, i gysylltu â nhw.

Cafwyd hyd i gyrff Jevon Hirst, 16, Harvey Owen, 17, Wilf Fitchett, 17, a Hugo Morris, 18, ger pentref Garreg fore Mawrth.

Cadarnhaodd Heddlu'r Gogledd bod y car Ford Fiesta arian roedd y bechgyn yn teithio ynddo wedi ei ddarganfod "ben i lawr", ac "yn rhannol dan ddŵr".

Mae'r llu yn awyddus i dderbyn lluniau gan yrwyr oedd yn teithio ar hyd yr A4085 rhwng Penrhyndeudraeth a Beddgelert rhwng 11:00 ar 19 Tachwedd a 10:00 21 Tachwedd.

• Cymuned 'wedi'i sobri' ar ôl marwolaeth dynion ifanc

• Mam 'mewn hunllef' wedi marwolaeth pedwar dyn ifanc

• Canfod pedwar corff wrth chwilio am ddynion ifanc ar goll

Fe gadarnhaodd swyddogion bod teuluoedd rhai o'r dynion ifanc wedi ymweld â safle'r gwrthdrawiad ddydd Iau.

Cafodd gwylnos arall ei chynnal ym mhentref Llanfrothen nos Iau.

Roedd y pedwar yn astudio cyrsiau lefel A yn Shrewsbury College

Y gred yw bod y criw wedi teithio o Sir Amwythig i Harlech ddydd Sadwrn gyda chynlluniau i wersylla yn Eryri.

Doedd neb wedi gweld na chlywed gan y pedwar ers bore Sul, a sbardunodd hynny ymdrech chwilio fawr yn y gogledd orllewin.

Ond fore Mawrth, ar ôl derbyn gwybodaeth gan aelod o'r cyhoedd, cafodd y car ei ddarganfod ger ffordd yr A4085.

Mae ffordd yr A4085 bellach wedi ailagor

Mae arwyddion a conau wedi cael eu gosod ger safle'r gwrthdrawiad

Dywedodd yr Uwch-arolygydd Simon Barrasford bod ymchwiliad "llawn a manwl" ar waith er mwyn darganfod achos y gwrthdrawiad.

"Mae rhan o'r ymchwiliad hwnnw yn cynnwys edrych ar luniau teledu cylch cyfyng a hoffem ddiolch i bawb sydd eisoes wedi cysylltu â ni.

"Mae rhan o'r ymchwiliad hefyd yn cynnwys ymchwiliad fforensig llawn ar y car ac mae'r gwaith yma'n parhau gyda'r Uned Ymchwilio Fforensig Gwrthdrawiadau.

"Hoffem hefyd ddatgan ein diolch i'r gymuned yng Ngharreg am eu amynedd a dealltwriaeth parhaol."

Mae swyddogion yn annog unrhyw un sydd â gwybodaeth neu luniau camera cerbyd a all gynorthwyo'r ymchwiliad i gysylltu â'r Uned Troseddau'r Ffyrdd drwy'r wefan gan nodi'r rhif cyfeirnod 23001169854.