Diswyddo gwerthwr tai wedi ymchwiliad ymddygiad

Mae asiantaeth dai wedi diswyddo'r gwerthwr tai Ian Wyn-Jones yn dilyn ymchwiliad i'w ymddygiad.

Fe gafodd Mr Jones ei wahardd dros dro o'r asiantaeth fis Medi yn dilyn honiadau a wnaed mewn ymchwiliad ei fod wedi camarwain cwsmeriaid.

Mewn datganiad dywedodd cwmni eXp UK eu bod wedi diswyddo Mr Wyn-Jones yn sgil tystiolaeth yn yr ymchwiliad oedd yn dangos nad oedd yn cyrraedd safonau ymddygiad priodol.

Mae Mr Wyn-Jones wedi cael cais am ei ymateb, ond yn y gorffennol mae wedi dweud nad yw'n derbyn yr honiadau.

• Gwahardd gwerthwr tai dros honiadau ymchwiliad

Dywedodd y cwmni bod Ian Wyn-Jones wedi ymuno â'r asiantaeth ym mis Medi 2021.

Roedd honiadau ar raglen Y Byd ar Bedwar yn dweud iddo greu cynigion ac ymweliadau ffug wrth werthu tai, a'i fod heb basio ymlaen cynigion i brynu.

Fe gafodd yr ymchwiliad ffurfiol ei gwblhau gan uwch aelodau o dîm eXp Global yn yr Unol Daleithiau.

Mewn datganiad, dywedodd eXp UK: "O dan yr amgylchiadau, mae Ian Wyn-Jones wedi ei ddiswyddo fel partner i eXp ar unwaith.

"Daw hyn yn sgil tystiolaeth i'w fethiant i gynnal safonau disgwyliedig y cwmni i'w cwsmeriaid."

Mae Mr Wyn-Jones wedi cael cais am ei ymateb i'r datblygiad.

Yn y gorffennol, gwadodd yr honiadau yn ei erbyn gan ddweud nad oedd yn eu derbyn.