Cwpan Her Ewrop: Scarlets 7-23 Black Lion

Ryan Conbeer o'r Scarlets yn cael ei daclo gan Akaki Tabutsadze

Mae tymor siomedig y Scarlets yn parhau gyda cholled hollol annisgwyl yng Nghwpan Her Ewrop yn erbyn y newydd-ddyfodiaid i'r gystadleuaeth, Black Lion.

Roedd hi'n edrych yn addawol i ddechrau i dîm Dwayne Peel pan diriodd Vaea Fifita, cyn iddyn nhw ildio 23 o bwyntiau i'r tîm o Georgia sy'n cystadlu am y tro cyntaf trwy wahoddiad.

Fe groesodd Miriani Modebadze a Beka Mamrikashvili y llinell naill ochr i'r egwyl i'r ymwelwyr ac fe ychwanegodd ciciau Luka Matkava 13 o'r pwyntiau.

7-23 oedd hi felly yn Llanelli, ac mae'r Scarlets yn parhau ar waelod Grŵp 3 ac eto i sgorio unrhyw bwyntiau.

Mae'r canlyniad yn golygu eu bod nawr wedi colli saith o'u naw gêm ar draws y cystadlaethau ers dechrau'r tymor.