Dyn wedi marw yn dilyn gwrthdrawiad ger Llanbradach
- Cyhoeddwyd
Mae dyn ifanc wedi marw yn dilyn gwrthdrawiad yn Sir Caerffili nos Wener.
Cafodd y gwasanaethau brys eu galw i'r A469 ger Llanbradach, rhwng Ystrad Mynach a Chaerffili tua 18:20.
Un cerbyd oedd yn y gwrthdrawiad - car Mazda gwyn, ac fe gadarnhaodd parafeddygon y Gwasanaeth Ambiwlans bod teithiwr yn y car - dyn 20 oed o Bontllanfraith - wedi marw yn y fan a'r lle.
Mae gyrrwr y car, dyn 18 oed sydd hefyd o Bontllanfraith, yn y ddalfa ar ôl cael ei arestio ar amheuaeth o achosi marwolaeth trwy yrru'n beryglus a gyrru dan ddylanwad cyffuriau.
Mae perthnasau'r dyn a fu farw wedi cael gwybod ac maen nhw'n cael cefnogaeth gan swyddogion arbenigol Heddlu Gwent.
Mae'r llu eisiau clywed gan unrhyw un oedd yn teithio ar yr A469 rhwng 18:00 a 18:30 nos Wener 15 Rhagfyr allai gynnig gwybodaeth neu lluniau dashcam.
Maen nhw hefyd yn apelio am luniau CCTV all fod o gymorth i'r ymchwiliad.