Aelodau Llafur yn cwrdd i drafod pryderon am Vaughan Gething

Mae Vaughan Gething yn gwadu ei fod wedi gwneud unrhyw beth o'i le

Mae'r BBC yn deall fod gwleidyddion Llafur Cymru wedi cynnal cyfarfod nos Lun i drafod pryderon ynglŷn â'u harweinydd newydd.

Mae Vaughan Gething wedi cael ei feirniadu wedi iddo dderbyn rhodd ariannol o £200,000 gan gwmni sy'n cael ei redeg gan ddyn a gafodd ei ddyfarnu'n euog ddwywaith am droseddau amgylcheddol.

Mae Aelodau Llafur o'r Senedd wedi dweud eu bod am i Mr Gething ddeall lefel y pryder o fewn y blaid.

Dywedodd un ffynhonnell wrth BBC Cymru bod 14 o wleidyddion wedi cyfarfod nos Lun i drafod y mater.

Mae disgwyl i Mr Gething ddod yn brif weinidog ddydd Mercher yn dilyn ymddiswyddiad ffurfiol Mark Drakeford ddydd Mawrth.

• Vaughan Gething yn gwrthod dychwelyd rhodd o £200,000

• Pum peth sy'n wynebu Prif Weinidog nesaf Cymru

Yn ôl un Aelod Llafur o'r Senedd, mae yna deimlad cynyddol o fewn y grŵp seneddol y dylai'r arian gael ei ddychwelyd, gyda rhai hyd yn oed yn bygwth peidio pleidleisio amdano ddydd Mercher os nad yw hynny'n digwydd.

"Fedra i ddim gweld hynny yn digwydd mewn gwirionedd, ond gyda dim ond 30 pleidlais - oni bai bod y pleidiau eraill yn atal eu pleidlais - yr oll mae'n gymryd yw i un Aelod Llafur fynd yn groes er mwyn atal y broses," meddai'r AS.

Dywedodd aelod arall "nad oes unrhyw un wedi dweud eu bod am atal eu pleidlais, ond nad oedden nhw'n hoff o weld pobl yn cymryd y canlyniad yn ganiataol cyn iddyn nhw gael atebion i'w cwestiynau".

Mae disgwyl i Mr Gething ddod yn brif weinidog ddydd Mercher

Ddydd Sadwrn, fe wnaeth Mr Gething drechu Jeremy Miles i fod yn arweinydd Llafur Cymru gan ennill 51.7% o'r bleidlais.

Yn gynharach ddydd Llun fe wnaeth o addo cynnal adolygiad o'r system rhoddion ariannol mewn ymgyrchoedd arweinyddiaeth Llafur Cymru.

Dros y penwythnos fe wnaeth Mr Gething wrthod galwadau i dalu'r arian yn ôl i Dauson Enviromental Group.

David John Neal yw cyfarwyddwr cwmni Dauson Enviromental Group

David John Neal yw perchennog Dauson, a daeth i'r amlwg ei fod o wedi ei erlyn yn 2013 am ollwng gwastraff yn anghyfreithlon ar Wastadeddau Gwent, ac eto yn 2017 am fethu â glanhau'r gwastraff.

Mae Mr Gething wedi amddiffyn ei berthynas gyda'r sefydliad, gan wrthod yr awgrym ei fod wedi lobïo o blaid cwmni Atlantic Recycling - sydd â chysylltiadau gyda Dauson Environmental.

Fe wnaeth Mr Gething ofyn i Cyfoeth Naturiol Cymru (CNC) lacio'r cyfyngiadau ar gwmni Atlantic Recycling yn 2016, ac yn 2018, mewn llythyr pellach, dywedodd wrth swyddogion CNC nad oedd rheswm iddyn nhw oedi penderfyniad ynglŷn â thrwydded.

Mae Llafur Cymru wedi cadarnhau y bydd unrhyw arian dros ben o'r ymgyrchoedd arweinyddiaeth yn cael ei roi i'r blaid.

'Dim byd o'i le'

Dywedodd Vaughan Gething ar raglen Politics Wales dros y penwythnos: "Does dim byd yn anghywir â'r hyn yr ydym wedi ei wneud.

"Wyth mlynedd yn ôl nes i ysgrifennu at CNC fel aelod o'r etholaeth, dim lobïo yw hynny - mae lobïo yn air llwythog, fel rydym yn gwybod," meddai Mr Gething.

"Fel cynrychiolydd eich etholaeth, eich swydd yw cynrychioli eich etholaeth, unigolion a busnesau.

"Dy' ni heb wneud dim byd y tu allan i'r rheolau. Does dim byd o'i le gyda'r hyn yr ydym wedi ei wneud."