A fydd hen reilffordd yn datrys problemau parcio Glangwili?

Yn ôl cynghorwyr mae hwn yn “gam sylweddol i’r cyfeiriad cywir”

Gallai problemau parcio yn Ysbyty Glangwili yng Nghaerfyrddin gael eu datrys, diolch i orsaf reilffordd gyfagos.

O'r wythnos nesaf ymlaen, bydd Rheilffordd Gwili yn darparu mannau parcio pwrpasol i staff yr ysbyty.

Mae parcio wedi bod yn broblem ar y safle am flynyddoedd, gyda chiwiau yn achosi tagfeydd.

Yn ôl cynghorwyr, sydd wedi bod yn ymgyrchu ers blynyddoedd i ddelio â'r problemau parcio, mae'r “diwedd yn nesáu” i’r diflastod mae trigolion lleol wedi ei wynebu.

Mi fydd hyd at 144 o lefydd parcio ychwanegol ar gael o fis Medi ymlaen

O'r wythnos nesaf ymlaen fe fydd 70 o lefydd parcio ychwanegol ar gael i staff sy'n gweithio yn Ysbyty Glangwili, gyda'r gobaith o gynyddu'r nifer i 144 dros y misoedd nesaf.

Yn ôl cynghorwyr sydd wedi bod yn ymgyrchu ers blynyddoedd i ddatrys y problemau parcio i staff, cleifion ac ymwelwyr, mae hwn yn “gam sylweddol i’r cyfeiriad cywir”.

Dywedodd Alun Lenny, cynghorydd Gogledd a De Caerfyrddin: “O’r diwedd mae’r diwedd yn nesáu i’r diflastod i drigolion lleol, mewn stadau fel Hafod Cwnin a Nash Avenue sydd wedi gorfod dioddef parcio gwael sy’n gysylltiedig â’r ysbyty y tu allan i’w cartrefi ers blynyddoedd."

“Rwy’n mawr obeithio y bydd y tagfeydd ar Heol Bronwydd a Ffordd Abergwili nawr hefyd yn rhywbeth o’r gorffennol.

"Fel fy nghyd-gynghorwyr, ni allaf ganmol Rheilffordd Gwili ddigon am eu rhan wrth ddatrys y broblem hirwyntog hon.”

Mi fydd yna lwybr diogel i staff gerdded o’r maes parcio i’r ysbyty rhwng dydd Llun a dydd Gwener o 9 tan 5.

Dywedodd Matt Bowen, Cadeirydd Rheilffordd Gwili ei fod yn "hyfryd i wybod bod nawr gennym ni ddatrysiad rhannol o leiaf"

Agorodd Rheilffordd Gwili yn wreiddiol yn 1860 ac roedd yn cludo teithwyr a nwyddau oedd yn cael eu cynhyrchu'n lleol fel gwlân, da byw, llaeth a phren.

Erbyn heddiw mae’n reilffordd stêm dreftadaeth sy’n cynnig teithiau i ymwelwyr er mwyn iddyn nhw ddysgu am hanes yr ardal ac mae'r atyniad yn dibynnu ar wirfoddolwyr.

Dywedodd Matt Bowen, Cadeirydd Rheilffordd Gwili: “Fel rhywun sy’n gweithio’n lleol dwi’n ymwybodol o’r broblem.

"Mae’n hyfryd i wybod bod nawr gennym ni ddatrysiad rhannol o leiaf.

"Bydd hi’n grêt i staff allu dod i gwaith heb orfod poeni am ffeindio rhywle i barcio.”

Mae Rheilffordd Gwili yn talu am y llwybr, y giât a'r goleuadau sy'n arwain at dir yr ysbyty.

Mae’r cynllun wedi ei ariannu gan grantiau a rhoddion.

Ychwanegodd Mr Bowen bod yna "elfen gymunedol i waith y rheilffordd a dyw e ddim i gyd am yr arian felly ni’n falch o allu helpu’r gymuned a’r ysbyty.”

'Gwneud parcio'n haws i gleifion'

Dywedodd Andrew Carruthers, Prif Swyddog Gweithredu Bwrdd Iechyd Prifysgol Hywel Dda: “Nawr bod y lleoedd hyn ar gael, byddwn yn cadw’r maes parcio uchaf – sydd â 64 o leoedd – ar gyfer cleifion yn unig.”

“Bydd y newidiadau hyn yn cefnogi gwelliant yn llif y traffig o flaen y safle ac yn gwneud parcio’n haws i gleifion."