Dynes wedi marw ar ôl cael ei tharo gan lori ailgylchu

Fe ddigwyddodd y gwrthdrawiad ar Stryd Brookes yn Llandudno fore Llun

Mae dyn wedi cael ei arestio ar ôl i ddynes oedrannus farw ar ôl cael ei tharo gan lori ailgylchu yn Llandudno.

Dywedodd Heddlu Gogledd Cymru fod y gwrthdrawiad wedi digwydd ar Stryd Brookes tua 09:00 fore Llun.

Fe wnaeth y gwasanaethau brys - gan gynnwys ambiwlans awyr - fynychu'r digwyddiad, ond bu farw'r ddynes 89 oed yn y fan a'r lle.

Mae dyn wedi cael ei arestio ar amheuaeth o achos marwolaeth trwy yrru'n beryglus, ac mae'n parhau yn y ddalfa.

Mae'r heddlu yn apelio ar unrhyw un sydd â gwybodaeth am y digwyddiad i gysylltu â nhw.