Rhoi'r gorau i ymgyrch i achub tafarn yng Ngwynedd dros dro

Roedd angen i'r grŵp cymunedol gasglu £75,000 er mwyn gallu prynu'r adeilad yn y pentref ger Blaenau Ffestiniog

Mae ymgyrch gymunedol i geisio achub tafarn hanesyddol yng Ngwynedd wedi cael ei ohirio dros dro.

Roedd ymgyrchwyr yn gobeithio prynu'r Wynnes Arms ym Manod ger Blaenau Ffestiniog, ac eisoes wedi cael addewid o £50,000 mewn grant gan Gyngor Gwynedd.

Ond dywedodd yr ymgyrchwyr ar y cyfryngau cymdeithasol fore Mawrth ei bod yn "siom fawr" eu bod yn gorfod "rhoi'r gorau i'r ymgyrch ar gyfer y Wynnes dros dro".

Dywedon nhw fod hynny oherwydd bod y dyddiad ar gyfer defnyddio'r cyllid oedd ganddyn nhw mewn egwyddor, wedi pasio.

Ychwanegon nhw fod "cryn dipyn i fynd i gyrraedd y targed", ond eu bod yn parhau i fod yn obeithiol ac yn benderfynol o wireddu'r freuddwyd.

£75,000 mewn pythefnos

Fe gyhoeddodd y grŵp cymunedol fis diwethaf bod ganddyn nhw bythefnos i gasglu £75,000 er mwyn ceisio prynu'r adeilad.

Gyda'r adeilad ar y farchnad, gobaith grŵp Wynnes Cymunedol yw ei berchnogi fel menter gymunedol.

Mae eu cynlluniau yn cynnwys creu bar a chaffi, cerddoriaeth fyw a digwyddiadau, llety hostel, gweithgareddau dros dro, marchnadoedd cynnyrch, arlwywyr gwadd, a llogi ystafelloedd.

Fel nifer o dafarndai cymunedol eraill ar draws Cymru, bwriad y grŵp oedd casglu digon o arian mewn cyfranddaliadau i sefydlu busnes fydd yn cael ei redeg gan yr aelodau.

Roedd y Wynnes, a gafodd ei hagor yn 1867, yn arfer bod yn un o dafarndai mwyaf poblogaidd yr ardal, ond mae wedi ei chau ers 2017.

Ers cau'r drysau mae sawl cais cynllunio wedi eu cyflwyno i drosi'r adeilad yn fflatiau.

Roedd y Wynnes yn arfer bod yn un o dafarndai mwyaf poblogaidd yr ardal, ond mae wedi ei chau ers 2017

Dywedodd pwyllgor yr ymgyrch fore Mawrth: "Er bod angen i ni ailfeddwl ein strategaethau ariannu, rydym am ad-dalu cyfranddaliadau dros yr wythnos nesa.

Dywedon nhw hefyd y bydden nhw "mewn cyswllt gyda phawb ac ymchwilio i ffynonellau cyllid amgen".

"Mae ein hymrwymiad i droi'r Wynnes yn dafarn gymunedol yn parhau'n gadarn!

"Gyda'ch cefnogaeth barhaus, credwn yn gryf y gallwn ddod o hyd i ffyrdd newydd o wireddu'r freuddwyd hon.

"Diolch o galon am eich amynedd a'ch dealltwriaeth wrth i ni weithio tuag at ddyfodol llwyddiannus i'n cymuned."

Ychwanegon nhw eu bod yn "diolch yn ddiffuant i Gyngor Gwynedd am roi'r cyfle am gyllideb Cronfa Ffyniant i ni fel cymuned".

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.