Pythefnos i achub tafarn 'eiconig' ym Mlaenau Ffestiniog

Mae grŵp cymunedol yn dweud bod ganddyn nhw bythefnos i achub tafarn hanesyddol yng Ngwynedd.

Mae'r ymgyrchwyr, sy'n ceisio prynu'r Wynnes Arms, Manod, eisioes wedi cael addewid o £50,000 fel grant gan Gyngor Gwynedd.

Ond maen rhaid i'r grŵp cymunedol gasglu'r £75,000 sy'n weddill er mwyn gallu prynu'r adeilad yn y pentref ger Blaenau Ffestiniog, ac mae ganddyn nhw bythefnos i wneud hynny.

Dywedodd un o'r trefnwyr, oedd mewn cyfarfod cyhoeddus nos Fercher fel rhan o'r ymgyrch, eu bod yn gobeithio cael digon o bobl i ymuno gyda'r fenter er mwyn cyrraedd y nod.

Mae'r dafarn yn "eiconig" yn y pentref, meddai Gwenlli Evans

"Mae'n braf i weld y gymuned yn dod allan ac yn cefnogi ymgyrch sydd mor bwysig i'n cymuned ni yma," meddai Gwenlli Evans ar raglen Dros Frecwast ar BBC Radio Cymru.

"Mae'r £75,000 just er mwyn prynu'r adeilad cyn mynd ymlaen efo planiau sydd geno ni, ond dwi'n credu'n gryf fedrwn ni 'neud o.

"Mae'n ddwy wythnos rŵan, ac yn push mawr i 'neud hi.

"Mae o wedi bod ar gau ers naw i wyth mlynedd ac rydan ni wedi colli'r rhan yna o ddod at ein gilydd fel cymuned - yr elfen gymdeithasol yna.

"Dim just i yfed ond yr elfennau eraill sy'n dod efo fo."

Mae'r Wynnes Arms wedi bod yn rhan bwysig o bentref Manod, ger Blaenau Ffestiniog, ers ei sefydlu yn 1867

Roedd y Wynnes, gafodd ei hagor yn 1867, yn arfer bod yn un o dafarndai mwyaf poblogaidd yr ardal, ond mae wedi ei chau ers 2017.

Ers cau'r drysau mae sawl cais cynllunio wedi eu cyflwyno i drosi'r adeilad yn fflatiau.

Ond gyda'r adeilad ar y farchnad, gobaith grŵp Wynnes Cymunedol yw ei berchnogi fel menter gymunedol.

Mae eu cynlluniau yn cynnwys creu bar a chaffi, cerddoriaeth fyw a digwyddiadau, llety hostel, gweithgareddau dros dro, marchnadoedd cynnyrch, arlwywyr gwadd, a llogi ystafelloedd.

Fel nifer o dafarndai cymunedol eraill ar draws Cymru, bwriad y grŵp ydy casglu digon o arian mewn cyfranddaliadau i sefydlu busnes fydd yn cael ei redeg gan yr aelodau.

Ers agor y cynllun cyfranddaliadau wythnos diwethaf maen nhw wedi casglu £6,000.

Dywedodd Ms Evans eu bod wedi cael cymorth a chyngor gan nifer o grwpiau cymunedol tebyg.

Meddai: "Mae tafarndai yn cael eu cymunedoli yn aml iawn ac rydan ni wedi cael nifer yn estyn allan.

"Rydan ni wedi bod yn ffodus iawn i dderbyn cefnogaeth gan Tafarn Pengwern, yn Llan Ffestiniog, a lot o dafarndai cyfagos ac wedyn wedi edrych ar be' sydd wedi gweithio i bawb a sut ddaru pawb fynd o gwmpas hi. Rydan ni'n rhan o deulu fel yna mewn ffordd.

"Mae'r Wynnes reit yng nghanol y pentref, mae o ar y groesffordd ac yn rhywle sydd i fod yn gyrchfan gymunedol. I fi mae'n eiconig."

Ychwanegodd bod manylion eu cynllun busnes a ffurflen ymuno â'r fenter ar eu gwefan ac ar eu tudalen Facebook.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.