Dwy ddynes wedi marw ar ôl disgyn ym mynyddoedd Eryri
Bu farw dynes ar ôl syrthio ar fynydd Glyder Fach yn gynharach yn y mis
- Cyhoeddwyd
Mae dwy ddynes wedi marw ar ôl disgyn wrth gerdded ar fynyddoedd Eryri.
Dywedodd Tîm Achub Mynydd Dyffryn Ogwen eu bod wedi eu galw i ddau ddigwyddiad o fewn dyddiau i'w gilydd yn ddiweddar.
Ar 16 Chwefror, fe lithrodd dynes ar ddarn o wair a syrthio tua 10 medr wrth gerdded i lawr Glyder Fach.
Bu farw er gwaethaf ymdrechion ffrind - a gafodd ei anafu yn y digwyddiad - yr ambiwlans awyr a thimau achub mynydd i'w hachub.
Ar 22 Chwefror, fe ddisgynnodd dynes 20 medr i dir serth ar fynydd Tryfan.
Fe wnaeth cerddwyr a oedd yn mynd heibio, timau ambiwlans a thimau achub mynydd ymateb i'r digwyddiad, ond bu farw o ganlyniad i'w hanafiadau.