'Arwr' ifanc wedi achub ei chwaer fach rhag tân gwyllt

Aeth Olly i'r ysbyty i dderbyn gofal ar ôl cael llosgiadau i'w ben, ei wddf a'i ddwylo

Mae bachgen ysgol wedi ei alw'n arwr ar ôl achub ei chwaer ddwyflwydd oed rhag tân gwyllt.

Llwyddodd Olly, sy'n 11, i wthio ei chwaer fach Daisy o'r ffordd, wrth i dân gwyllt ddisgyn drosodd a dod syth amdanynt mewn arddangosfa ym Mhont-y-pŵl.

Cafodd Olly losgiadau ar ei ben, ei wddf a'i ddwylo pan aeth y tân gwyllt yn sownd yn ei ddillad.

Dywedodd ei fam, Charlotte, y byddai'r sefyllfa wedi bod yn llawer gwaeth os na fyddai Olly wedi ymateb fel y gwnaeth.

"Fe wnaeth e ymateb mor gyflym. Roeddwn i'n gallu ei weld yn digwydd, ond doeddwn i methu symud, dwi ddim yn gwybod sut y gwnaeth e mor gyflym."

'Ddim yn sylweddoli mawredd y peth'

Aeth Olly i'r ysbyty i dderbyn gofal a chafodd fynd adre erbyn 04:00 y bore.

"Mae e'n iawn nawr. Dwi ddim yn meddwl ei fod e'n sylweddoli mawredd y peth mae e wedi'i wneud, dydy e ddim wedi sylweddoli eto," meddai Charlotte.

"Roedd Daisy yn sefyll o'i flaen, oni bai ei fod e wedi ei symud hi, byddai wedi'i tharo yn ei hwyneb."

Roedd Olly i fod yn chwarae mewn band pibau ar orymdaith Sul y Cofio dros y penwythnos, ond oherwydd bod ei fysedd wedi'u hanafu, ni fydd yn medru chwarae yno.

Yn lle hynny, bydd Olly yn gosod torch yno ar ran y band.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.