Prif hyfforddwr Abertawe Alan Sheehan wedi'i ddiswyddo

Doedd Alan Sheehan ddim wedi rheoli ar lefel mor uchel cyn ymuno ag Abertawe

Mae Clwb Pêl-droed Abertawe wedi diswyddo eu prif hyfforddwr, Alan Sheehan ar ôl chwe mis wrth y llyw.

Cafodd y Gwyddel ddau gyfnod fel rheolwr dros dro'r clwb cyn cael y rôl yn barhaol tua diwedd tymor 2024-25 yn dilyn ymadawiad Luke Williams.

Ond dim ond pedair gêm mae Abertawe wedi'u hennill yn y Bencampwriaeth allan o 15 y tymor hwn - record waethaf y clwb ers iddyn nhw gwympo o'r Uwch Gynghrair yn 2018.

Ar ôl colli dydd Sadwrn o 4-1 yn erbyn Ipswich Town yn Stadiwm Swansea.com, maen nhw bellach yn y 18fed safle.

Cafodd Sheehan ei benodi'n gynorthwyydd i Michael Duff yn ystod haf 2023 a bu'n rheoli'r tîm cyntaf dros dro ym mis Rhagfyr ar ôl i'r rheolwr adael.

O dan arweiniad Sheehan, fe gipiodd yr Elyrch 11 o bwyntiau allan o 21 cyn i Luke Williams gael ei benodi'n barhaol i gymryd lle Duff ym mis Ionawr 2024.

Ond ychydig dros flwyddyn yn ddiweddarach, roedd Sheehan yn ôl fel rheolwr dros dro ar ôl i Williams gael ei ddiswyddo.

Bydd gêm nesaf Abertawe yn y gynghrair yn erbyn Bryste yn Ashton Gate ddydd Sadwrn, 22 Tachwedd.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.