Anelu am record byd drwy gwblhau 4 Ironman mewn 4 diwrnod

Mae Leigh Wallis yn gobeithio gosod record byd cwbl newydd, a chodi arian i elusenau sy'n agos at ei galon

Pedwar Ironman, mewn pedwar diwrnod, mewn pedwar cornel o'r Deyrnas Unedig - dyna'r her i Leigh Wallis o'r Pîl ym Mhen-y-bont.

I gyflawni Ironman mae'n rhaid nofio am 2.4 milltir, seiclo am 112 o filltiroedd, ac yna rhedeg Marathon.

Yn achos Leigh, bydd angen gwneud hynny i gyd bedwar o weithiau o fewn pedwar diwrnod ym mhob un o wledydd Prydain os am lwyddo i osod record byd cwbl newydd.

"Dechrau yn Iwerddon, wedyn fferi dros nos i'r Alban. Dechrau eto ar ddydd Gwener ac wedyn symud lawr i'r Cotswolds yn Lloegr cyn gorffen ar y carped coch yn Ironman Dinbych y Pysgod ar y dydd Sul os fydd popeth yn mynd i plan," meddai.

I gyflawni Ironman mae'n rhaid nofio am 2.4 milltir, seiclo am 112 o filltiroedd, ac yna rhedeg Marathon

Ceisio gwthio ei hun i'r eithaf yw'r bwriad, ond mae codi arian yn rhan fawr o'r sialens hefyd.

"Dwi'n mynd i godi arian i ddwy elusen bwysig iawn - Maggies a'r National Autistic Society," meddai.

"Dwi isie trio cael gymaint o arian a phosib i'r ddwy elusen.

"Mae pawb yn nabod rhywun sydd wedi cael canser ac mae fy nai yn autistic, felly mae'n agos at fy nghalon."

"Dwi 'di bod yn siarad am y sialens yma ers 20 mis neu fwy," meddai Leigh

Gyda llai na 24 awr i fynd cyn i'r her ddechrau, mae Leigh yn teimlo'n "hyderus".

"Y cwestiwn yw, a fydd y corff yn dal allan. Dwi ddim wedi 'neud pedwar diwrnod o training fel hyn ers dechrau, ond dwi'n hyderus y byddaf yn gallu gosod y record byd yma.

"Dwi 'di bod yn siarad am y sialens yma ers 20 mis neu fwy, dwi just isie dechre nawr.

"Dwi'n hyderus y byddai'n gosod y record byd yma."

Mae'r tywydd garw diweddar yn ychwanegu ar yr her, yn ôl Leigh

Mae'r tywydd wedi bod yn stormus iawn dros y dyddiau diwethaf, ond dyw hynny ddim yn amharu dim ar hwyliau Leigh.

"Dwi'n meddwl bod tywydd fel hyn yn rhan o'r her ac yn neud e mor gyffrous. Mae'n teimlo'n ddwl i ddweud hynny, ond dwi'n edrych ymlaen, bring it on."

Ar ôl gorffen Ironman Dinbych y Pysgod, fe fydd Leigh yn cyflwyno cofnod GPS i recordiau Guiness.

Fe fyddan nhw'n asesu'r data, ac yn edrych ar dystiolaeth fideo, ac ymhen wythnos, mae'n gobeithio cael gwybod a yw wedi llwyddo yn ei ymdrechion i osod record byd cwbl newydd.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.