Dyn wedi ei gyhuddo o geisio llofruddio baban yng Ngheredigion

Mae dyn wedi ei gyhuddo o geisio llofruddio baban yng Ngheredigion.

Cafodd yr heddlu eu galw i gyfeiriad yn Y Ferwig, Ceredigion, toc cyn 22:15 nos Fercher, Ionawr 15, yn dilyn adroddiadau o bryderon am les baban.

Cafodd y plentyn ifanc ei gludo yn syth i'r ysbyty, lle mae'n parhau mewn cyflwr difrifol.

Mae Rhydian Jamieson, 27 o Gwm Cou, Castell Newydd Emlyn, wedi ei gyhuddo o geisio llofruddio.

Mae Jamieson wedi ei gadw yn y ddalfa a bydd yn ymddangos yn Llys Ynadon Hwlffordd ddydd Llun, Ionawr 20.