Rhybudd am stormydd taranllyd ledled Cymru tan nos Sadwrn

Mae rhybudd melyn mewn grym rhwng 14:00 ddydd Gwener a 18:00 ddydd Sadwrn

Mae'r Swyddfa Dywydd wedi cyhoeddi rhybuddion am stormydd taranllyd i Gymru tan nos Sadwrn.

Mae arbenigwyr yn rhybuddio y gallai'r tywydd garw achosi llifogydd a thrafferthion i deithwyr.

Mae'n bosib y bydd trenau yn rhedeg yn hwyr ac y bydd cyflenwadau pŵer yn cael eu colli am gyfnodau.

Mae'r Swyddfa Dywydd yn annog pobl i fod yn ofalus wrth yrru, ac i osgoi teithio os yn bosib.

Dydd Sadwrn mae disgwyl y tywydd gwaethaf, ac fe allai gael effaith ar ddigwyddiadau fel Tafwyl yng Nghaerdydd, a Sioe Aberystwyth.

Beth yw'r rhybuddion?

Prynhawn Gwener bydd rhybudd melyn yn weithredol rhwng 14:00 a hanner nos ar draws Cymru i gyd.

Mae gan rybudd melyn debygolrwydd isel, ond fe allai greu trafferthion teithio a llifogydd mewn mannau.

Mae disgwyl y tywydd gwaethaf ddydd Sadwrn, gyda rhybudd melyn arall mewn grym ar gyfer Cymru gyfan rhwng hanner nos a 18:00.

Mae'r Swyddfa Dywydd yn rhybuddio y gallai llifogydd sydyn arwain at amodau gyrru anodd a chau rhai ffyrdd.

Mae'n bosib y bydd toriadau pŵer, a rhybudd bod siawns y gallai llifogydd cyflym a dwfn achosi perygl i fywyd.

Gallai 60-80mm o law ddisgyn mewn rhai ardaloedd, gyda chenllysg a gwyntoedd cryfion hefyd yn bosib.