Gweithiwr iechyd wedi'i gyhuddo o gam-drin i'w weld yn 'ddyn neis'

Ieuan Crump, sy'n gwadu naw o gyhuddiadau, yn gadael y llys wedi gwrandawiad blaenorol

Mae llys wedi clywed bod dynes sy'n honni bod cynorthwyydd meddygol dan hyfforddiant wedi ymosod arni'n rhywiol wedi ei ddisgrifio yn y gorffennol fel "dyn neis iawn".

Dywedodd hefyd wrth y rheithgor yn Llys y Goron Caerdydd ei bod wedi cytuno y gallai Ieuan Crump wylio nyrs benywaidd yn gosod cathetr.

Wrth roi tystiolaeth o'r tu ôl i sgrin, cadarnhaodd y ddynes ei bod wedi disgrifio'r diffynnydd mewn neges destun at ei phartner fel dyn clên.

Mae Mr Crump, 26, o Gilfach, Caerffili, yn gwadu naw cyhuddiad - chwech o ymosodiad rhyw, a thri o ymosodiad drwy dreiddiad.

Fe ddigwyddodd y troseddau honedig wrth i Ieuan Crump weithio yn Ysbyty Athrofaol Y Faenor

Wrth gael ei chroesholi, fe gytunodd y ddynes nad oedd hi wedi gwneud unrhyw gŵyn am y ddau sgan cyntaf a wnaed gan Mr Crump yn ystod ei chyfweliad cyntaf gyda’r heddlu.

Cafodd y sganiau eu cynnal yn Ysbyty Athrofaol Y Faenor yn Nhorfaen ym mis Awst 202, tra bod y ddynes yn gwella ar ôl llawdriniaeth ar yr abdomen.

Pan ddechreuodd y ddynes ddioddef o boen yn ei bol, clywodd y llys fod nyrs benywaidd a Ieuan Crump wedi trafod gosod cathetr i ddraenio ei phledren a bod y ddynes wedi cytuno y gallai Mr Crump fod yn bresennol yn ystod y broses.

Ar ôl i'r nyrs fenywaidd fethu â gosod y cathetr, dywedodd y ddynes mewn datganiad heddlu bod Mr Crump wedi dweud: "Oes ots gennych chi os ydw i'n rhoi cynnig arni?"

Clywodd y llys wedyn ei bod, yn y datganiad, wedi dweud bod Ieuan Crump wedi gosod bys yn ei fagina ac wedi dweud: "Allwch chi deimlo hynny?"

Mae'r achos yn cael ei gynnal yn Llys y Goron Caerdydd

Wrth gyfeirio at ei datganiad blaenorol i'r heddlu, dywedodd y bargyfreithiwr ar ran yr amddiffyniad fod y ddynes wedi awgrymu fod y nyrs benywaidd yn bresennol drwy gydol y broses.

Awgrymodd yr amddiffyn nad Mr Crump oedd wedi gosod y cathetr, ond gwrthod hynny wnaeth y ddynes.

Ychwanegodd y ddynes bod y diffynnydd wedi ymosod arni eto pan sganiodd ei phledren dridiau’n ddiweddarach, a’i fod wedi ei chyffwrdd yn amhriodol heb wisgo menig.

Clywodd y llys fod y ddynes wedi ceisio cysylltu â'r diffynnydd ar ôl iddi adael yr ysbyty.

Wrth gael ei hail-archwilio dywedodd y ddynes ei bod ar ei phen ei hun gydag Ieuan Crump pan geisiodd osod y cathetr, a bod y nyrs wedi gadael er mwyn "nol meddyg".

Clywodd y llys hefyd fod y ddynes wedi gwneud cwyn ar wahân am nyrs arall, y credai nad oedd wedi rhoi digon o gyffuriau lleddfu poen iddi yn ystod ei chyfnod yn yr ysbyty.

Mae Mr Crump yn gwadu naw cyhuddiad o ymosod yn rhywiol, gan gynnwys tri honiad o ymosodiad rhywiol drwy dreiddiad..

Mae'r achos yn parhau.