Pwy sy'n ymgeisio yn yr etholiad Comisiynwyr Heddlu?

Mae'r comisiynwyr yn gyfrifol am oruchwylio heddluoedd yng Nghymru a Lloegr a'u dwyn i gyfrif

Mae'r ymgeiswyr wedi'u cadarnhau ar gyfer etholiadau'r Comisiynwyr Heddlu a Throsedd ar 2 Mai.

Mae'r pedair prif blaid yng Nghymru - Llafur, Ceidwadwyr, Plaid Cymru a'r Democratiaid Rhyddfrydol - yn sefyll.

Dyma fydd yr etholiad cyntaf yng Nghymru ble bydd rhaid i bobl ddangos dogfen adnabod gyda llun cyn pleidleisio.

Does dim ymgeiswyr annibynnol nac ymgeiswyr o'r blaid Werdd na Reform yn sefyll.

Dyma'r unig etholiad sy'n cael ei gynnal yng Nghymru ar 2 Mai - yn wahanol i Loegr, ble mae yna etholiadau ar gyfer cynghorau lleol hefyd.

Mae dau o’r Comisiynwyr presennol yn rhoi’r gorau i’w swyddi eleni – Alun Michael dros Lafur yn Ne Cymru a Jeff Cuthbert y Comisiynydd Llafur yng Ngwent.

Beth yw rôl Comisiynwyr Heddlu?

Sefydlwyd Comisiynwyr Heddlu a Throsedd yn 2012 gan lywodraeth David Cameron.

Mae'r comisiynwyr yn gyfrifol am oruchwylio heddluoedd yng Nghymru a Lloegr a'u dwyn i gyfrif, ac maent yn gosod y gyllideb flynyddol ar gyfer pob ardal.

Nid ydynt yn gyfrifol am benderfyniadau ynglŷn â gwaith dydd i ddydd yr heddlu.

Mae dau o’r comisiynwyr presennol yn rhoi’r gorau i’w swyddi eleni

Yng Nghymru mae pedwar Comisiynydd Heddlu a Throseddu, un ar gyfer pob ardal blismona - De Cymru, Gwent, Dyfed-Powys, a Gogledd Cymru.

Mae'r comisiynwyr ymhlith y swyddogion etholedig sy'n derbyn y cyflogau gorau yng Nghymru.

Ar hyn o bryd yn Ne Cymru mae Alun Michael yn cael £86,700.

Mae Jeff Cuthbert yng Ngwent yn derbyn £73,302, tra bod comisiynydd Gogledd Cymru Andy Dunbobbin yn cael £73,300.

Mae Comisiynydd Dyfed-Powys, Dafydd Llywelyn yn ennill cyflog o £68,200 y flwyddyn.

Dangos dogfen adnabod

Am y tro cyntaf bydd angen dangos dogfen adnabod gyda llun cyn pleidleisio.

Ymysg y dogfennau y gellir ei ddefnyddio mae pasbort Prydeinig, trwydded yrru, cerdyn teithio rhatach 60 oed a hŷn, cerdyn teithio rhatach person anabl, neu gerdyn adnabod y cynllun safonau prawf oedran (cerdyn PASS).

Mae bellach angen defnyddio cardiau adnabod mewn etholiadau sy'n cael eu rhedeg gan Lywodraeth y Deyrnas Unedig, gan gynnwys etholiadau cyffredinol ar gyfer San Steffan.

Nid oes angen unrhyw brawf ar gyfer etholiadau’r Senedd, na chynghorau Cymru.

Dyma'r eildro i etholiadau Comisiynwyr Heddlu a Throsedd gael eu cynnal yng Nghymru heb unrhyw bleidleisiau eraill yr un pryd.

Y tro diwethaf oedd yr etholiad cyntaf yn 2012, a bryd hynny 14.9% oedd y ganran a bleidleisiodd ar draws Cymru.

Pwy sy'n ymgeisio?

Ymgeiswyr Gwent

• Donna Cushing, Plaid Cymru

• Mike Hamilton, Democratiaiad Rhyddfrydol Cymru

• Hannah Jarvis, Ceidwadwyr Cymreig

• Jane Mudd, Llafur Cymru

De Cymru

• Sam Bennett, Democratiaiad Rhyddfrydol Cymru

• George Carroll, Ceidwadwyr Cymreig

• Dennis Clarke, Plaid Cymru

• Emma Wools, Llafur Cymru

Dyfed-Powys

• Justin Griffiths, Democratiaiad Rhyddfrydol Cymru

• Ian Harrison, Ceidwadwyr Cymreig

• Dafydd Llywelyn, Plaid Cymru

• Philippa Ann Thompson, Llafur Cymru

Gogledd Cymru

• Andy Dunbobbin, Llafur Cymru

• Ann Griffith, Plaid Cymru

• Brian Jones, Ceidwadwyr Cymreig

• David Richard Marbrow, Democratiaiad Rhyddfrydol Cymru