Meddygon teulu yn derbyn cynnig tâl 'sylweddol well'

Mae'r cynnig diweddaraf yn well o lawer na'r un gafodd ei gynnig ym mis Rhagfyr, yn ôl BMA Cymru

Mae'r corff sy'n cynrychioli meddygon teulu yng Nghymru'n dweud eu bod wedi derbyn cynnig codiad cyflog diweddaraf Llywodraeth Cymru.

Fe bleidleisiodd aelodau BMA Cymru yn erbyn derbyn y cynnig gwreiddiol ym mis Rhagfyr, ond mae cynnig "sylweddol well" yn dod â'r codiad i'r un lefel â'r 6% sy'n cael ei argymell gan gorff adolygu tâl meddygon a deintyddion.

Mae'r llywodraeth am roi swm untro o £23m yn ychwanegol ar gyfer setliad eleni, sy'n dod â'r cyfanswm ar gyfer 2024/25 i £52.1m.

Fe fydd hynny, meddai'r BMA, "yn helpu meddygon teulu i ddarparu gwasanaethau hanfodol i'w cymunedau, gan roi mwy o sefydlogrwydd i feddygfeydd, cleifion a staff".

Dywedodd yr Ysgrifennydd Iechyd Jeremy Miles ei fod yn "falch o gyhoeddi y byddwn yn buddsoddi £52.1m ym maes meddygaeth deulu eleni".

Problemau i barhau, er y setliad

Mae'r cynnig, yn ôl datganiad BMA Cymru, yn "sicrhau tâl teg" i holl aelodau staff meddygfeydd, gan gynnwys y partneriaid a'r meddygon teulu cyflogedig, mewn cyfnod o "amgylchiadau heriol".

Ond gan groesawu cynnig diweddaraf y llywodraeth, fe rybuddiodd cadeirydd eu pwyllgor meddygon Cymreig, Dr Gareth Oelmann, na fydd y setliad "yn datrys pob problem".

Mae disgwyl "costau amhosib eu hosgoi" ar ddechrau'r flwyddyn ariannol newydd, meddai, ond mae cytundeb eleni yn "sylfaen gadarn" ar gyfer y trafodaethau ynghylch setliad 2025/26.