Sarah Lianne Lewis yn ennill Medal y Cyfansoddwr yn Eisteddfod Wrecsam

Sarah Lianne Lewis yw enillydd Medal y Cyfansoddwr Eisteddfod Genedlaethol Wrecsam

Mae Sarah Lianne Lewis wedi ennill Medal y Cyfansoddwr yn Eisteddfod Wrecsam.

Mewn seremoni arbennig nos Sadwrn, cododd y pafiliwn ar eu traed i gymeradwyo'r cyfansoddwr buddugol am ei darn 'Cysgodion Bywiog'.

I gydnabod canmlwyddiant ers geni Islwyn Ffowc Elis, un o feibion amlycaf ardal Wrecsam, thema Medal y Cyfansoddwr eleni oedd Cymru Fydd.

Dywedodd un o'r beirniaid, Richard Baker, bod darn Sarah yn "theatrig iawn gyda naratif cryf, ac mae'r ddeialog yn eglur iawn rhwng y deunydd sydd yn cynrychioli'r galar, a'r deunydd sydd yn cynrychioli'r gobaith."

Mae Medal y Cyfansoddwr eleni yn cael ei gyflwyno i'r cyfansoddwr mwyaf addawol ar gyfer cyfansoddiad i ensemble siambr gan ddefnyddio delweddau o Rondda Cynon Taf fel ysbrydoliaeth.

Roedd trefnwyr yr Eisteddfod am i artistiaid gyflwyno syniadau ar sut y gallent ymateb drwy gerddoriaeth i nofel ffuglen-wyddonol epig Islwyn Ffowc Elis: 'Wythnos yng Nghymru Fydd'.

Roedd Sarah Lianne Lewis yn un o dri chyfansoddwr oedd wedi gweithio gyda cherddorion proffesiynol ar gyfer perfformiad cyntaf o'i ddarn buddugol. Y ddau arall oedd Jonathan Guy ac Owain Gruffydd Roberts.

Cafodd darnau'r tri chyfansoddwr eu perfformio yn y Pafiliwn gan Simmy Singh (ffidl), David Shaw (ffidl/fiola) a Garwyn Linnell (sielo).

Y beirniad oedd Richard Baker, Lleuwen Steffan a Graeme Park.

'Anodd iawn i ddod i benderfyniad'

Dywedodd Richard Baker nad oedd penderfyniad y beirniad yn hawdd a bod y tri chyfansoddwr wedi gwneud gwaith arbennig.

Yn ei feirniadaeth dywedodd: "Yn unol â neges y nofel, mae pob cyfansoddwr yn edrych i'r dyfodol gyda gobaith. Ond hefyd: yn gyson ceir yma rhyw ymdeimlad o bryder sydd yn gwasgu ar y gobaith hwn.

"Yr her oedd gallu cyfleu'r cysyniad yma trwy gyfrwng cerddoriaeth offerynnol, a dylid canmol y tri ohonyn nhw am eu huchelgais.

"Roedd yn anodd iawn i ddod i benderfyniad. Doeddwn i ddim yn gyfan gwbl gytûn a dweud y gwir. Yn y diwedd, mater o chwaeth bersonol oedd yn ein harwain."

Pwy yw'r enillydd?

Yn wreiddiol o Geredigion, astudiodd Sarah Lianne Lewis ym Mhrifysgol Caerdydd gan ennill gradd BA (Anrh) mewn Cerddoriaeth a Hanes ac MA mewn Cyfansoddi.

Ers hynny mae ei cherddoriaeth wedi'i pherfformio yn Ewrop, Canada ac Awstralia, wedi'i darlledu ar sawl gorsaf radio yn y DU ac Ewrop, ac wedi'i chynnwys mewn nifer o wyliau dramor.

Fel cyfansoddwraig ac unawdydd, mae'n cynnal gweithdai mewn ysgolion, gan ganolbwyntio ar feithrin creadigrwydd a chyfansoddi yn yr ystafell ddosbarth, yn ogystal â chynnal dosbarthiadau meistr lleisiol i gerddorion amatur.

Yn ogystal â'r fedal derbyniodd Sarah wobr ariannol o £750.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.