Cyhuddo dyn 21 oed o bostio fideo yn bygwth myfyrwyr coleg
- Cyhoeddwyd
Mae dyn 21 oed wedi ymddangos yn y llys wedi ei gyhuddo o bostio fideo ar-lein yn bygwth myfyrwyr coleg.
Fe wnaeth Oliver Beynon o Fochriw, Caerffili, gadarnhau ei enw, ei gyfeiriad a'i ddyddiad geni yn llys ynadon Casnewydd ddydd Mawrth.
Mae wedi cael ei gyhuddo o anfon negeseuon yn bygwth marwolaeth neu niwed difrifol.
Dywedodd erlynwyr bod y fideo, sydd wedi cael ei wylio 2,500 o weithiau ar YouTube, yn cynnwys "manylion graffig" o fygythiadau i ladd pobl sy'n mynychu Y Coleg, Merthyr Tudful.
Fe gytunodd ynadon i ryddhau Mr Beynon ar fechnïaeth gydag amodau llym ynglŷn â lle y bydd yn byw, a chyrffyw dros nos.
Dydi o ddim yn cael mynd i Y Coleg, Merthyr Tudful, nac i fewn i dref Merthyr Tudful ei hun.
Mae wedi ei wahardd hefyd rhag defnyddio'r cyfryngau cymdeithasol.
Mae disgwyl iddo ymddangos yn Llys y Goron Caerdydd ar 29 Medi.
Mewn datganiad a gyhoeddwyd gan y coleg, fe wnaethon nhw gadarnhau eu bod wedi agor ar gyfer diwrnod cyntaf y tymor "yn dilyn adolygiad ac asesiad trylwyr o ddiogelwch staff, dysgwyr a defnyddwyr yr adeilad".