Meddwlgarwch yn y Gymraeg i daclo straen

Yn ôl Sion Jones mae myfyrio am 15 munud pob dydd yn gwneud lles aruthrol i'r meddwl

Mae wythnos gyntaf mis Tachwedd pob blwyddyn yn wythnos ryngwladol ymwybyddiaeth straen.

Mae'r wythnos yn rhoi cyhoeddusrwydd a chodi phroffil effaith straen ar bobl a theuluoedd.

Un sy'n gweithio i leihau straen mewn unigolion drwy gynnig gwersi meddwlgarwch drwy gyfrwng y Gymraeg yw Sion Jones.

Dyma ei hanes a sut wnaeth droi ei gefn ar yrfa yn y cyfryngau ar ôl gweld y galw am gyrsiau yn y Gymraeg.

Hyfforddi yn India

Mae Sion yn wreiddiol o Aberystwyth ond bellach yn byw yn Stroud, Sir Caerloyw.

Mae wedi bod yn myfyrio a chymryd rhan mewn gweithgareddau yoga ers ei fod yn 18 oed.

Cafodd gyfnod yn gweithio i S4C fel Swyddog Rheoli Cynnwys cyn penderfynu nad oedd eisiau parhau i weithio yn y maes cyfryngau.

"Roeddwn wedi bod yn gweithio i S4C a phan oeddwn yn 26 nes i benderfynu symud i India am bedwar mis.

"Roeddwn yn gweithio mewn maes ble roedd 'na lot o straen a phwysau gwaith felly roeddwn yn myfyrio yn ddyddiol.

"Nes i benderfynu yn y diwedd nad oedd y math yma o waith yn addas i mi a phenderfynu symud i India am gyfnod.

"Roeddwn eisiau hyfforddi’n iawn mewn yoga ac un o'r llefydd gorau i wneud hynny yw yn Ashram yn Kerala," meddai.

Mae gan Sion gysylltiad teuluol ag India; roedd ei hen dad-cu yn arfer pregethu yno yn y 1920au.

Wedi cyfnod yn hyfforddi'n India daeth Sion yn ôl i Brydain a symud i fyw i Lerpwl.

Mae Sion yn cynnig gwersi drwy gyfrwng y Gymraeg

Yn Lerpwl roedd yn cynnal dosbarthiadau yoga a meddwlgarwch yn y Saesneg a phan ddaeth y cyfnod clo roedd yn rhaid iddo addasu o wersi wyneb yn wyneb i rai arlein.

Sylwodd yn eithaf cyflym nad oedd llawer o sesiynau drwy gyfrwng y Gymraeg yn cael eu cynnig.

"Roeddwn wedi sylwi nad oedd gwersi Cymraeg unrhyw le, felly dyma fi yn mynd at i gynnig cyrsiau a gwersi meddwlgarwch ar-lein," meddai.

"Mae sesiynau meddwlgarwch yn cynnig myfyrdodau gwahanol pob dydd.

"Os yw pobl yn teimlo straen neu ddiffyg cwsg yna mae'r ymarferion yma wedi'u cynllunio i geisio gwella'r sefyllfa," meddai.

Rheoli gor-bryder

Mae unrhyw wersi meddwlgarwch hefyd yn canolbwyntio ar reoli gor-bryder a straen.

Mae'r ffocws ar sut i fynd ati i ymlacio'n haws a sut i ymdopi gyda'ch meddyliau.

Un sydd wedi gweld budd mawr o allu gwneud sesiynau meddwlgarwch drwy gyfrwng y Gymraeg yw Angharad Williams.

"Dwi'n teimlo ei bod yn fuddiol bod cwrs o’r fath ar gael drwy gyfrwng y Gymraeg i hybu meddwlgarwch.

"Yn bersonol dwi wedi gwerthfawrogi’r cwrs gan fy mod i’n gweld hi’n haws ymlacio yn fy mamiaith," meddai.

Dywedodd Angharad Williams ei bod hi'n haws ymlacio yn ei mamiaith

Wrth gymharu yoga a meddwlgarwch, dywedodd Sion fod yoga'n fwy am y symudiadau i rannau o'ch corff, tra bod meddwlgarwch yn eich dysgu i chi hyfforddi eich hun ar sut i ganolbwyntio ar y presennol.

Mae hefyd yn cynnwys ffyrdd ar sut i fyfyrio a chyfri'r nifer o weithiau rydych yn anadlu.

"Mae'n eithriadol o fuddiol os ydych yn teimlo dan straen neu'n byw bywyd prysur ac eisiau amser i gamu'n ôl ac ymlacio," meddai.

"Mae cymaint o bwyslais y dyddiau hyn ar iechyd meddwl a rheoli gor-bryder a straen.

"Gall myfyrdod dyddiol hyd at chwarter awr wneud byd o wahaniaeth i unigolyn."

Mae Sion Jones yn wreiddiol o Aberystwyth

"Roedd hi'n bwysig i mi allu cyflwyno'r math yma o ddisgyblaeth yn y Gymraeg. Dwi'n dod o Aber ac mae'n ffordd i mi allu cadw mewn cysylltiad â Chymru a chael defnyddio'r Gymraeg tra dwi'n byw yn Lloegr.

"Ers gwneud sesiynau yn y Gymraeg dwi wedi synnu gweld fod cymaint o alw.

"Dwi wrth fy modd yn gallu gwneud hyn y Gymraeg a gweld yr effaith bositif mae'n ei gael ar unigolion," meddai.