Bocsio: Buddugoliaeth arall i'r bencampwraig Lauren Price

Bydd Lauren Price yn herio'r bencampwraig Natasha Jonas ym mis Mawrth 2025

Roedd yna lwyddiant arall i'r Gymraes, Lauren Price, nos Sadwrn wrth iddi gadw ei theitl o fod yn bencampwr pwysau welter y byd wedi gornest yn erbyn Bexcy Mateus o Golombia.

O'r dechrau. o flaen torf o 4,000 yn Lerpwl, roedd llaw chwith Price yn drech na Mateus ac fe stopiodd y dyfarnwr yr ornest yn y drydedd rownd.

Lauren Price yw'r ferch gyntaf o Gymru i ennill pencampwriaeth bocsio byd.

Fe drechodd Jessica McCaskill o Chicago ym mis Mai eleni i hawlio pencampwriaeth pwysau welter y WBA.

Wedi'r ornest nos Sadwrn dywedodd: "Mae cyflymdra yn dod â phŵer ac fe wnes i fwynhau fy hun heno.

"Roeddwn i'n awyddus i wneud rhywfaint o ddatganiad."

Dywedodd hefyd ei bod yn awyddus i weld gornestau bocsio mawr yn digwydd yng Nghymru.

Fe fydd hi nawr yn mynd ymlaen i herio'r bencampwraig Natasha Jonas ym mis Mawrth y flwyddyn nesaf.