Teyrnged mam i'w merch, 17, 'gofalgar, creadigol, doniol'

Mae mam wedi rhoi teyrnged i'w merch "gofalgar, creadigol, doniol" wrth i gymuned yn Sir Caerffili ddod ynghyd i'w chofio.

Bu farw Lainie Williams, 17, yr wythnos ddiwethaf yng Nghefn Fforest ger y Coed-duon.

Daeth dros 250 o bobl at ei gilydd nos Iau i ryddhau balŵns ac i gofio amdani.

Mae dyn 18 oed o Drecelyn wedi ei gyhuddo o'i llofruddiaeth.

'Roedd hi'n caru pawb'

Yn siarad nos Iau, fe wnaeth mam Lainie, Rhian Stephens, ddiolch i'r gymuned am eu cefnogaeth ers y digwyddiad.

Cafodd Ms Stephens hefyd ei hanafu yn yr ymosodiad honedig ar 13 Tachwedd.

"Dwi eisiau i fy mabi gael ei chofio", meddai, gan ddweud bod Lainie y "ferch gyda'r galon fwyaf yn y byd".

"Roedd hi'n caru ei theulu, roedd hi'n dod i roi cusan i fi bob nos a rhoi ei breichiau amdanaf.

"Roedd hi mor ofalgar, roedd hi'n caru pawb..."

Cafodd Rhian Stephens ei hanafu yn y digwyddiad hefyd

Ychwanegodd Ms Stephens ei bod yn dal i wella ers y digwyddiad, ond bod ganddi "gefnogaeth fy nheulu sydd wedi bod yn wych".

Dywedodd ewythr Lainie, Adrian Stephens, y byddai ei nith wedi mwynhau bod yr awyr yn binc adeg y digwyddiad nos Iau.

"Roedd hi'n annwyl, yn artistig, yn gall," meddai.

"Bydd pawb yn gweld ei cholli hi'n fawr. Dwi ddim yn meddwl bod geiriau i ddisgrifio a dweud y gwir."

Ychwanegodd: "Roedd hi fel enfys, a dyna'r oll alla i ddweud amdani."

Mae dros £12,000 wedi ei godi drwy wefan casglu arian i dalu costau angladd Lainie, a diolchodd Mr Stephens i "bawb ymhob un o'n cymunedau, alla i ddim diolch iddyn nhw ddigon".

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.