Corff menyw, 32, wedi ei ddarganfod rhwng dau gar - cwest

Cafodd corff Nirodha Niwunhella ei ddarganfod yn gynnar ddydd Iau ar 21 Awst

Mae agoriad cwest yn achos marwolaeth menyw 32 oed wedi clywed bod ei chorff wedi ei ddarganfod rhwng dau gar wedi eu parcio ar stryd yng Nghaerdydd.

Clywodd y gwrandawiad mai aelod o'r cyhoedd ddaeth o hyd i gorff Niwunhellage Dona Nirodha Kalapni Niwunhella, oedd yn cael ei galw'n Nirodha, yn ardal Glan-yr-afon y ddinas o gwmpas 07:30 fore Iau 21 Awst.

Clywodd hefyd bod Ms Niwunhella ag anafiadau sylweddol, ac yn ôl casgliad cychwynnol archwiliad post-mortem bu farw o ganlyniad cael sawl anaf â rhyw fath o arf finiog.

Mae Thisara Weragalage, dyn 37 oed o Bentwyn, wedi ei gyhuddo o'i llofruddio.

Cafodd yr heddlu eu galw i ardal Glan-yr-afon y ddinas yn dilyn adroddiadau bod menyw wedi cael anafiadau difrifol

Fe gafodd y cwest ei ohirio nes canlyniad proses gyfreithiol yr achos.

Estynnodd y Crwner Patricia Morgan ei chydymdeimlad â theulu Ms Niwunhella.

Mae ei theulu wedi ei disgrifio fel "merch ac aelod annwyl o'r teulu, a ffrind i nifer" a oedd wedi "cyffwrdd â llawer o fywydau gyda'i charedigrwydd a'i chynhesrwydd".