Cannoedd mewn dwy brotest wahanol yn y Drenewydd

Roedd tua 400 o bobl yn rhan o orymdaith 'stopio'r cychod'

Roedd tua 600 o bobl mewn dwy brotest wahanol yn y Drenewydd ym Mhowys ddydd Sadwrn.

Cafodd gorymdaith ei chynnal trwy'r dref, a chafodd ei threfnu gan bwyllgor lleol a'i hysbysebu fel protest 'stopio'r cychod' – roedd tua 400 o bobl yn bresennol.

Bu'r protestwyr yn llafarganu sloganau yn beirniadu Syr Keir Starmer, y Prif Weinidog a'r llywodraeth Lafur yn San Steffan, a chawson nhw eu hannerch gan Karl Lewis - cynghorydd sir o Bowys a adawodd y Blaid Geidwadol i ymuno â Reform UK ym mis Mawrth.

Yn ystod ei anerchiad, fe arweiniodd funud o dawelwch er cof am Charlie Kirk – yr ymgyrchydd a dylanwadwr asgell dde, a gafodd ei saethu a'i ladd mewn digwyddiad prifysgol yn Utah, yr Unol Daleithiau ddydd Mercher.

Roedd tua 200 o bobl yn bresennol mewn gwrth-brotest yn erbyn yr orymdaith gerllaw

Tra'r oedden nhw'n gorymdeithio drwy'r dref, cynhaliwyd gwrth-brotest mewn stryd gyfagos.

Roedd tua 200 o bobl yn bresennol yn yr wrth-brotest - rhai yn dal arwyddion gyda negeseuon o gefnogaeth i ffoaduriaid a mudwyr.

Anerchwyd y grŵp hwn gan nifer o siaradwyr, gan gynnwys Aelodau Seneddol - Steve Witherden AS Llafur dros Sir Drefaldwyn a Glyndŵr, a Liz Saville Roberts Plaid Cymru dros Ddwyfor Meirionnydd.

Gofynnwyd i Heddlu Dyfed-Powys am eu hamcangyfrif o nifer y bobl a oedd yn bresennol, ac os oedd unrhyw un wedi cael ei arestio.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.