Canfod corff wrth chwilio am ddyn aeth ar goll yn Afon Teifi

Mae corff dyn yn ei 20au wedi cael ei ganfod yn ardal Aberteifi dros nos yn dilyn ymgyrch gan y gwasanaethau brys i chwilio am ganŵiwr oedd wedi mynd ar goll.

Cafodd y gwasanaethau brys eu galw i'r ardal tua 19:45 nos Iau yn dilyn adroddiadau bod person yn y dŵr.

Dywed Heddlu Dyfed-Powys Police bod y corff heb gael ei adnabod yn swyddogol ond mae perthnasau'r canŵiwr wedi cael gwybod.

Mae swyddogion arbenigol yn rhoi cymorth i'r teulu.

Roedd bad achub Aberteifi yn rhan o'r ymgyrch i ddod o hyd i'r canŵiwr.

Fe gafodd y corff ei ddarganfod tua 01:00 fore Gwener, rai oriau wedi i'r chwilio ddechrau.

Roedd hofrennydd Gwylwyr y Glannau, bad achub RNLI Aberteifi, timau achub Aberteifi a Threwyddel, yr heddlu a chriwiau tân ac achub yn rhan o'r ymdrech.

Fe alwodd Heddlu Dyfed-Powys ar y cyhoedd i gadw draw o'r ardal tra bo'r chwilio yn mynd rhagddo.

Rhai o gerbydau'r gwasanaethau brys a gafodd eu hanfon fel rhan o'r ymgyrch i chwilio am y dyn coll yn Aberteifi nos Iau

Dywedodd Gwasanaeth Tân ac Achub Canolbarth a Gorllewin Cymru bod criwiau wedi eu hanfon i'r ardal o orsafoedd Hwlffordd, Caerfyrddin, Aberteifi a Chrymych.

Aeth dau dîm o achubwyr ar yr afon mewn cychod er mwyn chwilio am y person coll wrth i gydweithwyr archwilio hyd glannau'r afon.

Roedd y canŵiwr yn dal ar goll pan benderfynwyd, yn dilyn cyfarfod am 23:23 nos Iau, bod hi'n bryd i'w criwiau tân ac achub adael.