Storm Floris i daro gogledd Cymru â thywydd 'anarferol o wyntog'
Roedd tonnau mawr yn dod i'r lan yn Nhywyn, Gwynedd fore Llun
- Cyhoeddwyd
Mae disgwyl i Storm Floris daro rhan helaeth o ogledd Cymru ddydd Llun gyda thywydd "anarferol o wyntog".
Mae rhybudd melyn mewn grym rhwng 06:00 a hanner nos.
Dyma'r chweched storm i gael ei henwi gan y Swyddfa Dywydd y tymor hwn a'r gyntaf ers mis Ionawr.
Yn ôl y Swyddfa Dywydd, bydd y tywydd yn anarferol o wyntog ar gyfer yr adeg hon o'r flwyddyn ac fe allai gwyntoedd gyrraedd 70mya ar yr arfordir.
Mae cwmni Irish Ferries wedi canslo teithiau 07:30 a 13:50 rhwng Caergybi a Dulyn ddydd Llun oherwydd y tywydd, ond mae'r teithiau eraill yn rhedeg fel yr arfer.
Mae disgwyl i Storm Floris daro gogledd Cymru, yr Alban, Gogledd Iwerddon a gogledd Lloegr.
Fe allai'r tywydd garw, a fydd hefyd yn cynnwys glaw trwm amharu ar wasanaethau ffyrdd, a thrafnidiaeth gyhoeddus.
Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.
Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.
Lawrlwythwch yr ap am y diweddaraf o Gymru ar eich dyfais symudol.