Merch, 17, wedi marw yn dilyn gwrthdrawiad laddodd ddau Gymro
Roedd Sophie Bates yn 17 oed ac yn dod o Stafford
- Cyhoeddwyd
Mae'r heddlu wedi cyhoeddi enw merch 17 oed a fu farw o'i hanafiadau yn dilyn gwrthdrawiad a laddodd ddau ddyn ifanc o ardal Wrecsam.
Bu farw Dafydd Hûw Craven-Jones, 18, o Dan-y-fron, a Morgan Jones, 17, o Goedpoeth, mewn gwrthdrawiad un cerbyd yn Sir Stafford dros y penwythnos.
Cafodd dwy ferch 17 oed eu cludo i'r ysbyty wedi'r digwyddiad yn Penkridge.
Cadarnhaodd Heddlu Sir Stafford bod un ohonynt - Sophie Bates o Stafford - wedi marw nos Fawrth 28 Mai.
Roedd hi'n teithio yng nghefn y cerbyd Ford Ka pan ddigwyddodd y gwrthdrawiad, meddai Heddlu Sir Staffordd.
Mae'r ferch arall bellach wedi cael ei rhyddhau o'r ysbyty.
Mae teyrngedau wedi eu rhoi i Dafydd Hûw Craven-Jones a Morgan Jones
Dywedodd yr heddlu eu bod yn parhau i ymchwilio i amgylchiadau'r digwyddiad.
Dylai unrhyw un a welodd y gwrthdrawiad neu gerbyd Ford Ka yn y cyfnod cyn y digwyddiad, gysylltu gyda'r heddlu.
Cafodd teyrngedau eu rhoi gan deuluoedd y ddau ddyn ifanc fu farw.
Dywedodd teulu Dafydd Hûw Craven-Jones, gyrrwr y cerbyd, ei fod "yn fab, brawd, ewythr, ŵyr ac aelod ardderchog o'r teulu i bawb oedd yn ei adnabod".
Cafodd Morgan Jones ei ddisgrifio gan ei deulu fel "dyn ifanc caredig, gofalgar a chariadus yr oedden ni mor falch ohono".