Carcharu dyn o'r de am ysgogi casineb crefyddol

Dywedodd yr erlyniad fod negeseuon Gareth Boyce dangos "meddylfryd asgell dde a oedd wedi eu cymell gan grefydd a hiliaeth"

Mae dyn 43 oed o Donypandy wedi cael ei ddedfrydu i ddwy flynedd yn y carchar ar ôl cyfaddef cyhoeddi deunydd oedd â'r bwriad o ysgogi casineb crefyddol.

Fe wnaeth Geraint Boyce gyhoeddi sawl neges ar Facebook yn ystod y terfysgoedd yn ystod yr haf, a ddaeth yn dilyn llofruddiaeth tri o blant yn Southport.

Dywedodd y barnwr fod y negeseuon yn cynnwys "deunydd bygythiol i greu drwgdeimlad crefyddol".

Yn ôl yr erlyniad roedd y negeseuon yn dangos "meddylfryd asgell dde a oedd wedi eu cymell gan grefydd a hiliaeth".

Dywedodd yr erlyniad fod yr aflonyddwch cymdeithasol ar y pryd yn "gyd-destun pwysig".

Galw am losgi mosgiau

Fe gychwynnodd yr ymchwiliad ar ôl i AS Rhondda Buffy Williams gysylltu â'r heddlu ar ôl sylwi ar y negeseuon ar-lein yn gynnar fis Awst.

Roedd negeseuon Boyce yn cynnwys cyfres o luniau a sylwadau a oedd ar gael i'w gweld yn gyhoeddus.

Roedd y negeseuon yn cynnwys galw am losgi mosgiau tra bod pobl y tu mewn, ac i longau gael eu boddi ynghyd â'r rheiny oedd arni.

Dywedodd un neges ei fod "yn barod am ryfel", tra bod un arall yn dweud ei bod hi'n "amser i ymladd".

Roedd negeseuon eraill yn cynnwys baner yr undeb, ac roedden nhw'n wrth-Islamaidd.

Cydnabod fod ei farn yn 'anghywir'

Pan gafodd ei arestio, fe holodd Boyce "os yw hyn oherwydd y pethau ar-lein i wneud gyda'r terfysgoedd".

Yna fe wrthododd wneud sylw pan gafodd ei holi gan yr heddlu.

Dywedodd yr erlyniad fod y drosedd wedi gwaethygu gyda'i fwriad o "annog trais" a'r "darlun cenedlaethol" o'r terfysgoedd oedd yn digwydd ar y pryd.

Yn ôl cyfreithiwr Boyce, Nick Gedge, mae ganddo "gywilydd o'r hyn roedd wedi ei wneud" a'i fod "wedi cael y syniadau o'r hyn welodd ar-lein".

Dywedodd ei fod bellach yn cydnabod fod y farn honno yn "anghywir".