Prop Cymru Leon Brown yn ymddeol yn 28 oed oherwydd anaf

Fe wnaeth Brown ei ymddangosiad cyntaf dros ei wlad 'nôl yn 2017

Mae prop Cymru a'r Dreigiau, Leon Brown wedi cyhoeddi ei fod yn ymddeol o rygbi proffesiynol ar unwaith oherwydd anaf i'w wddf.

Fe wnaeth Brown, 28, chwarae 24 o gemau rhyngwladol i Gymru ar ôl gwneud ei ymddangosiad cyntaf yn 2017.

Gêm Cymru yn erbyn Yr Alban fis Chwefror 2024 yn ystod pencampwriaeth y Chwe Gwlad oedd ei ymddangosiad olaf dros ei wlad.

Mae'r prop pen tynn wedi dioddef o anafiadau i'w wddf yn y blynyddoedd diwethaf, ac o ganlyniad dim ond tair gwaith y mae wedi chwarae i'r Dreigiau hyd yma y tymor hwn.

'Amser gwrando ar fy ngwddf'

Wrth siarad am ei benderfyniad i ymddeol, dywedodd fod "popeth da yn dirwyn i ben ac wrth i mi edrych yn ôl ar fy ngyrfa, er ei fod yn fyrrach na'r hyn yr oeddwn wedi'i obeithio, dwi'n gwneud hynny gyda chymaint o atgofion ac yn difaru dim".

"Dwi wastad wedi credu bod popeth yn digwydd am reswm ac weithiau dyw pethau ddim fod i ddigwydd.

"Er bod gweddill fy nghorff yn teimlo'n barod i barhau â'r gamp, mae'n stori wahanol i fy ngwddf.

"Yn dilyn tair triniaeth yn ystod y tri thymor diwethaf, mae'n amser i mi wrando ar fy ngwddf a rhoi'r gorau iddi."