Achub mul a 'syrthiodd 20 metr lawr llethr' yn Aber-miwl
Swyddogion tân yn cludo Nicky y mul ar draws afon
- Cyhoeddwyd
Mae achubwyr yn y canolbarth wedi treulio tair awr yn dod i gymorth mul oedd wedi syrthio, yn ôl y gred, 20 metr i lawr llethr.
Cafodd criwiau tân eu galw i bentref Aber-miwl, ger Y Drenewydd, ychydig cyn 09:00 fore Sul.
Roedd yna filfeddyg yno hefyd i lonyddu'r mul, o'r enw Nicky, cyn i tua 15 o swyddogion tân ei roi ar sled a'i gludo ar draws afon.
Fe gafodd Nicky ei gludo'n ôl adref i ailymuno â mul arall ar gae cyfagos.
Y gred yw bod y mul wedi syrthio i lawr llethr i'r afon
Drama cyn y Nadolig - ond diweddglo da ac achubiaeth i'r mul o Aber-miwl
Fe gymrodd hi dair awr i ddiogelu'r mul, yn ôl llefarydd ar ran Gwasanaeth Tân ac Achub Canolbarth a Gorllewin Cymru.
Cafodd criwiau eu hanfon i Aber-miwl o Drefaldwyn, Y Drenewydd, Y Trallwng a Rhaeadr.