3 Llun: Lluniau pwysicaf Nia Parry

Mae Nia Parry yn wyneb cyfarwydd i wylwyr S4C

Os fyddai'n rhaid i chi ddewis tri llun sydd yn cynrychioli eich bywyd chi, pa luniau fydden nhw?

Y cyflwynydd Nia Parry sydd yn trafod rhai o'i hoff luniau gyda Cymru Fyw yr wythnos yma..

Nia gyda aelodau o'i theulu yn nhŷ ei nain a'i thaid

Dyma fi efo fy mrawd Dylan a fy nghyfnither Rhian, a Jim - ci Nain Madge a Taid Tal Sarn.

Mi oedd Nain a Taid yn byw drws nesa i ni ac mi oeddwn i wrth fy modd efo Jim ac efo'r holl geffylau odd ar y fferm.

Cafodd y llun yma ei dynnu ar Lôn Tŷ Cerrig odd dafliad carreg o'n cartre' ni yn Dwyran, Ynys Môn - lle fuon ni'n byw nes oeddwn i'n bump oed.

Mam a Dad wnaeth adeiladu'r tŷ yn Dwyran ac mae gen i lawer o atgofion hyfryd o fyw yno.

Ar Lôn Tŷ Cerrig oeddwn i'n mynd am dro yn y goets efo Mam a Dad a Nain Sally a Taid Bob, ac ar hyd y lôn yma wnes i ddysgu i reidio beic.

Dyl a Rhi ydy dau o'r bobl bwysica i fi yn y byd hyd heddiw ac mae gen i atgofion plentyndod mor hapus o fod efo nhw.

Dw i ddim yn edrach yn hapus iawn yn y llun, ond dwi'n licio fel dw i'n gafael yn dynn am Dyl.

Nia ar daith ar ôl gorffen ei chyfnod ym Mhrifysgol Abertawe

Ar ôl bod yn y Brifysgol yn Abertawe mi es i i deithio - i India, Nepal, Israel, Yr Aifft a Thwrci.

Teithio ydy'r addysg a'r profiad bywyd gorau erioed ac yn ystod y cyfnod yma dwi'n teimlo mod i wedi tyfu fel person. Bues i'n byw yn Istanbul am naw mis yn dysgu Saesneg yno ac mi oeddwn i wrth fy modd.

Dyna lle wnes i benderfynu mai tiwtor Cymraeg oeddwn i am fod.

Dwi'n cofio teimlo mor gysurus pan oedd y bag ar fy nghefn a finna'n gwybod mod i ar gychwyn i'r lleoliad nesa.

Cyn dod adre mi dreuliais i fis yn teithio o amgylch Twrci ac yma dw i'n dringo dros y bryn i Kayaköy, Fethiye a dwi'n cofio cyrraedd pen y bryn a theimlo y gallwn i gyflawni unrhyw beth mewn bywyd.

Erthygl bapur newydd yn 2004 yn sôn am raglen Welsh in a Week

Y swydd gyntaf gesh i yn y byd teledu oedd cyflwyno cyfres o'r enw Welsh in a Week, lle roeddwn i'n dysgu Cymraeg i rywun am wythnos er mwyn eu paratoi nhw i gyflawni her yn Gymraeg yn y gwaith.

Mi oeddwn i wrth fy modd efo'r antur newydd hon ac mi wnes i gyflwyno'r gyfres am bron i chwe blynedd yn ogystal â'r gyfres Cariad@Iaith.

Rhain oedd uchafbwyntiau fy ngyrfa i. Dw i'n dal i ystyried fy hun yn lwcus iawn i fod wedi cael gyrfa yn cyfuno dau faes dwi'n angerddol amdanyn nhw - dysgu Cymraeg a'r cyfryngau Cymraeg.

Yr iaith Gymraeg ydy bob dim i fi, heb os.

Dw i wrth fy modd efo pennawd yr erthygl yma hefyd... 'Spread the Word of Welsh'.

Hyd heddiw, dw i, fel miloedd o Gymry eraill yn trio gwneud hyn.

Hefyd o ddiddordeb: