Teyrngedau i'r 'arwr' Sol Bamba fu farw yn 39 oed

Roedd Sol Bamba yn "ŵr bonheddig go iawn" yn ôl Clwb Pêl-droed Caerdydd

Mae teyrngedau wedi eu rhoi i gyn-gapten Caerdydd, Sol Bamba, sydd wedi marw yn 39 oed.

Roedd yr amddiffynnwr o'r Traeth Ifori yn rhan o dîm yr Adar Gleision pan enillon nhw ddyrchafiad i’r Uwch Gynghrair yn 2018.

Cafodd driniaeth am ganser - Non-Hodgkin Lymphoma - ym mis Ionawr 2021 tra'n dal i chwarae yng Nghaerdydd.

Roedd yn ôl ar y cae bedwar mis yn ddiweddarach, gan gyhoeddi ei fod yn glir o ganser ar ôl triniaeth cemotherapi.

Yn fwyaf diweddar roedd wedi bod yn gweithio i glwb Adanaspor yn Nhwrci, a gyhoeddodd y newyddion ei fod wedi marw nos Sadwrn.

"Cafodd ein cyfarwyddwr technegol Souleymane Bamba ei gludo i Ysbyty Athrofaol Manisa Celal Bayar ddoe ar ôl iddo fynd yn sâl cyn y gêm yn erbyn Manisa ac yn anffodus collodd ei frwydr am ei fywyd yno. Rydym yn cydymdeimlo â'i deulu a'n cymuned," meddai'r clwb mewn datganiad.

Fe chwaraeodd Bamba 46 o weithiau i'r Traeth Ifori

Dywedodd Clwb Pêl-droed Caerdydd eu bod wedi derbyn y newyddion gyda'r "tristwch dyfnaf", gan ddisgrifio Bamba fel "arwr i'r clwb".

"Fel chwaraewr a hyfforddwr, roedd effaith Sol ar ein clwb pêl-droed yn amhrisadwy.

"Roedd yn arwr i bob un ohonom, yn un a oedd yn arweinydd ym mhob ystafell newid ac yn ŵr bonheddig go iawn," meddai llefarydd ar ran y clwb.

Roedd Bamba wedi bod yn cwblhau ei gymwysterau hyfforddi gyda Chymdeithas Bêl-droed Cymru, ac roedd yn y broses o astudio ar gyfer trwydded broffesiynol UEFA.

Dywedodd y gymdeithas mewn datganiad eu bod wedi eu "llorio gan y newyddion trist" a'u bod yn cydymdeimlo gyda'i deulu, ffrindiau a phawb oedd yn ei adnabod.

"Roedd pawb a weithiodd gyda Sol yn edmygu ei bositifrwydd a'i gariad at y gêm."

Bamba yn dathlu sgorio mewn buddugoliaeth yn erbyn Brighton yn yr Uwch Gynghrair

Fe ddechreuodd Bamba ei yrfa gyda Paris Saint Germain cyn symud i'r Alban i chwarae i Dunfermline a Hibernian.

Chwaraeodd i Leeds United, Leicester City, Trabzonspor a Palermo cyn iddo ymuno a Chaerdydd yn 2016.

Sgoriodd ar ei ymddangosiad cyntaf yn erbyn Bristol City, gan fynd yn ei flaen i chwarae rhan allweddol yn nyrchafiad y clwb i’r brif adran yn y tymor canlynol.

Fe wnaeth o chwarae yn yr Uwch Gynghrair am y tro cyntaf gyda Chaerdydd, gan sgorio pedair gôl i'r clwb Cymreig y tymor hwnw dan arweiniad Neil Warnock.

Dywedodd Warnock nad oedd yn gallu credu na fyddai "fyth yn gweld y wên anhygoel yna eto" ond ei fod yn "hapus fod Sol wedi bod yn rhan o'i fywyd a'u bod wedi rhannu cymaint o atgofion arbennig".

'O'dd ei wên e'n goleuo 'stafell'

Un a oedd yn adnabod Sol Bamba yn dda yw cyflwynydd Radio Cymru 2, Rhydian Bowen Phillips - sydd yn aml yn gwneud gwaith i Glwb Pêl-droed Caerdydd.

"O'dd 'da fe amser i bawb, o'dd e'n arwr ar y cae, ond roedd ei enaid oddi ar y cae just yn anhygoel," meddai ar raglen Dros Frecwast fore Llun.

"O'dd ei wên e'n gallu goleuo 'stafell, ac roedd e'n gwneud i chi deimlo fel taw chi oedd yr unig berson yn y stadiwm pan oedd e'n siarad 'da chi.

"Nes i weld e am y tro diwethaf mewn digwyddiad i chwaraewyr a fans (Caerdydd) yn ystod ei gyfnod fel hyfforddwr... o'dd e'r un hen Sol, o'dd e just mor hapus i fod nôl.

"O'dd pawb moyn chwarae i a gyda Sol... mae just mor drist."

Mae teyrngedau wedi eu rhoi gan nifer o hen glybiau Bamba, gan gynnwys Leeds United

Ar ol iddo gael ei ryddhau gan Gaerdydd, fe aeth i chwarae i Warnock eto ym mis Awst 2021 gan ymuno â Middlesbrough.

Ond fe ddychwelodd i Gymru yn 2023 fel rheolwr cynorthwyol i Sabri Lamouchi yng Nghaerdydd, gan helpu'r clwb i sicrhau eu lle yn y Bencampwriaeth.

Dywedodd gwraig Bamba, Chloe, mewn datganiad ar y cyfryngau cymdeithasol bod ei gwr wedi marw yn gwybod faint yr oedd pobl yn ei garu.

"Dros y blynyddoedd diwethaf rydw i wedi gwylio Sol yn brwydro'r canser yma yn galed gyda chryfder corfforol a meddyliol anhygoel," meddai.

"Ond yn anffodus, doedd hi ddim yn frwydr deg, ac fel yr oedd pethau yn edrych fel eu bod nhw'n gwella, fe aeth pethau o chwith.

"Roedd hi'n fraint cael caru a chael fy ngharu gan Sol. Fe ddysgais i gymaint ganddo. Fo yw fy arwr. Mae fy nghalon yn torri, ond am anrheg oedd cael fo yn fy ngharu."