Cymraes gafodd ei chadw yn y ddalfa yn yr UDA yn ôl yn y DU

Cyrhaeddodd Becky Burke yr Unol Daleithiau ar 7 Ionawr

Mae Cymraes gafodd ei chadw mewn canolfan fewnfudo yn yr Unol Daleithiau bellach wedi dychwelyd i'r DU.

Roedd Becky Burke, 28 o Sir Fynwy, wedi cael ei chadw mewn canolfan sy'n prosesu mewnfudwyr yn nhalaith Washington am dros bythefnos.

Cyrhaeddodd Ms Burke Efrog Newydd ar 7 Ionawr i ddechrau teithiau cerdded ar draws gogledd America, oedd fod i bara pedwar mis.

Ond ar ôl ymweld â gwahanol rannau o'r UDA ei bwriad oedd teithio i Vancouver yng Nghanada, ond cafodd ei gwrthod rhag cael mynediad i'r wlad gan swyddogion rheoli ffiniau.

Honnodd Ms Burke fod swyddogion Americanaidd wedi ei chwestiynu, ac wedi dod i'r casgliad ei bod wedi torri amodau ei fisa am ei bod yn aros gyda theuluoedd ac yn "helpu o amgylch y tŷ" yn gyfnewid am lety.

Dywedodd ei thad fod yr amodau yn y ganolfan lle cafodd Ms Burke ei chadw am 19 diwrnod yn "erchyll".

Fe gadarnhaodd y teulu fod Becky wedi glanio ym Maes Awyr Heathrow brynhawn Mawrth - lle'r oedd teulu a ffrindiau yn aros amdani.

Dywedodd Customs and Border Protection (CBP) yn yr Unol Daleithiau mewn datganiad blaenorol nad oedd modd iddynt wneud sylw ar achosion penodol.