Arestio dyn ar amheuaeth o lofruddio ym Mlaenafon
Cafodd yr heddlu eu galw i Rodfa Glan yr Afon ym Mlaenafon yn yr oriau mân fore Gwener
- Cyhoeddwyd
Mae dyn 34 oed wedi cael ei arestio ar amheuaeth o lofruddiaeth yn dilyn marwolaeth dyn yn Nhorfaen fore Gwener.
Cafodd y gwasanaethau brys eu galw i gyfeiriad yn Rhodfa Glan yr Afon ym Mlaenafon yn oriau mân y bore, yn dilyn adroddiadau bod dyn wedi cael ei anafu'n ddifrifol.
Bu farw dyn 47 oed o Flaenafon yn y fan a'r lle.
Mae dyn 34 oed o Dorfaen wedi ei arestio ar amheuaeth o lofruddio, ac mae'n parhau yn y ddalfa.
Dywedodd y Ditectif Brif Arolygydd Jitka Tomkova-Griffiths o Heddlu Gwent: "Rydym yn deall bod adroddiadau o'r fath yn medru bod yn bryderus, ond rydym wedi arestio dyn o'r ardal, a dydyn ni ddim yn chwilio am unrhyw un arall yn gysylltiedig â'r digwyddiad."
Ychwanegodd y bydd gan y llu fwy o bresenoldeb yn yr ardal wrth i ymholiadau barhau.
Maen nhw'n annog unrhyw un sydd â gwybodaeth i gysylltu â nhw.