Teyrnged i 'ddyn teulu ffyddlon' fu farw mewn gwrthdrawiad

Bu farw Rhys Jenkins, 41, yn dilyn gwrthdrawiad ger Y Trallwng

Mae teulu dyn a fu farw yn dilyn gwrthdrawiad ger Y Trallwng y penwythnos diwethaf wedi rhoi teyrnged iddo.

Bu farw Rhys Jenkins, 41 o Lyn-nedd, Castell-nedd Port Talbot, yn y fan a'r lle wedi gwrthdrawiad ar yr A483 ddydd Sadwrn, 16 Tachwedd.

Roedd Mr Jenkins yn teithio gyda'i fab naw oed sy'n parhau yn yr ysbyty yn gwella o'i anafiadau, meddai Heddlu Dyfed-Powys.

Dywedodd teulu Mr Jenkins ei fod yn "yn ŵr, tad a dyn teulu ffyddlon" a bod ei golled yn "gwbl ddinistriol" iddynt.

"Rydym yn ddiolchgar am y gefnogaeth a gawsom ers y digwyddiad gwirioneddol ofnadwy hwn ac yn parhau i gael ein cysuro gan y dymuniadau da.

"Byddem fel teulu yn ddiolchgar i gael amser i alaru yn awr," medden.

Cafodd dau ddyn eu cyhuddo o nifer o droseddau gyrru yn cynnwys gyrru dan ddylanwad cyffuriau ac achosi marwolaeth drwy yrru'n beryglus.

Mae’r ddau ddyn, sy'n 29 a 33 oed, wedi’u cadw yn y ddalfa.

Mae Heddlu Dyfed-Powys yn apelio ar unrhyw un sydd â gwybodaeth i gysylltu gyda nhw.