Eisteddfod Llangollen wedi ailagor yn dilyn 'digwyddiad meddygol'
Roedd y tair yma o India yn cystadlu fore Iau
- Cyhoeddwyd
Mae Eisteddfod Ryngwladol Llangollen wedi alilagor ar ôl i grŵp o blant gael eu cludo i'r ysbyty nos Fercher.
Dywedodd yr Eisteddfod fod cyngerdd Karl Jenkins wedi'i ganslo oherwydd yr hyn sy'n cael ei ddisgrifio fel "digwyddiad meddygol".
Fore Iau dywedodd Cyfarwyddwr Bwrdd yr Eisteddfod, David Hennigan: "Rydym yn falch o ddweud bod yr holl blant yn iawn a bod yr eisteddfod bellach wedi ailagor."
Dywedodd Dr Giri Shankar o Iechyd Cyhoeddus Cymru bod y "profion a gynhaliwyd ar y plant wedi dangos presenoldeb firysau anadlol cyffredin, gan gynnwys y ffliw".
Ychwanegodd eu bod yn cael eu trin yn briodol ac yn gwella a bod y "risg i'r cyhoedd yn parhau'n isel".
Bu'n rhaid i bobl adael maes yr Eisteddfod oherwydd y "digwyddiad meddygol" nos Fercher
Mewn ail ddatganiad yn hwyrach nos Fercher, dywedodd yr Eisteddfod fod y digwyddiad yn ymwneud ag achosion o "salwch yn debyg i'r ffliw" a bod "nifer o bobl wedi arddangos symptomau tebyg".
Ychwanegon nhw bod eu timau meddygol wedi bod yn gweithio gyda'r gwasanaethau brys wrth ymateb i'r digwyddiad "anarferol".
Dywedodd Gwasanaeth Ambiwlans Cymru mai 11 o bobl a gafodd eu cludo i Ysbyty Maelor Wrecsam.
Bore braf yn Llangollen wrth i'r drysau ailagor fore Iau
Ychwanegodd llefarydd ar ran yr ŵyl fod y Gwasanaeth Ambiwlans wedi cyhoeddi'r digwyddiad meddygol oherwydd "y nifer o bobl gafodd eu taro yn wael ar yr un pryd".
"Mae Eisteddfod Ryngwladol Llangollen yn trin diogelwch ymwelwyr, cystadleuwyr, perfformwyr a gwirfoddolwyr fel mater difrifol iawn," meddai'r llefarydd.
"O ganlyniad, ar ôl derbyn cyngor, bu'n rhaid i ni ganslo digwyddiad fel hyn am y tro cyntaf yn ein hanes."
Mae'r Eisteddfod wedi ymddiheuro am unrhyw anghyfleustra sydd wedi ei achosi ac wedi diolch i'r staff meddygol a'r gwirfoddolwyr am eu hymateb sydyn i'r digwyddiad.
Roedd Paul Jays a Penny Nicholson yn siomedig o golli'r cyngerdd
Roedd Paul Hays a Penny Nicholson wedi teithio o Landrindod yn unswydd ar gyfer y cyngerdd.
"Roedd mor annisgwyl" meddai Paul, "roedd natur y digwyddiad mor annarferol.
"Roedden ni'n edrych ymlaen gymaint i weld pobl o'r holl wledydd gwahanol yn dod at ei gilydd.
"Mae hynny mor bwysig y dyddiau hyn."
Ychwanegodd Penny eu bod "mor siomedig" a dywedodd y cafodd gyfle i siarad â Karl Jenkins yn eu gwesty bore dydd Iau ac "roedd e'n siomedig hefyd" meddai.