Tân eto ar fferm ganabis ar safle hen ysgol

Cafodd to'r adeilad ei ddifrodi gan y tân gwreiddiol ddydd Mercher 17 Gorffennaf

Mae criwiau tân wedi gorfod dychwelyd i ddiffodd fflamau ar safle hen ysgol yng Ngheredigion a gafodd ei defnyddio i dyfu canabis, wythnos wedi'r tân gwreiddiol.

Cafodd Gwasanaeth Tân ac Achub Canolbarth a Gorllewin Cymru eu galw i Heol Penwalle, yn Llandysul, tua 20:53 nos Iau.

Dywed y gwasanaeth bod fflamau wedi ailgynnau gan fod colsion (embers) wedi mudlosgi ers y tân mawr a achosodd i do'r adeilad gwympo ddydd Mercher 17 Gorffennaf.

Fe gafodd criwiau eu hanfon o Landysul a Chastellnewydd Emlyn, i roi dŵr ar y fflamau cyn gadael y safle am 21:50.

Roedd yn bosib i weld mwg y tân gwreiddiol o bellter

Daeth i'r amlwg ddechrau Gorffennaf fod yr adeilad wedi ei ddefnyddio fel safle i gynhyrchu canabis.

Fe blediodd dau ddyn yn euog ar 9 Gorffennaf i gyhuddiadau'n ymwneud â chyffuriau, ar ôl i gwerth £2m o ganabis gael ei ddarganfod yn yr hen ysgol.

Daeth yr heddlu o hyd i tua 1,500 o blanhigion canabis yno ar 4 Gorffennaf.